PD kundërshton reformën territoriale (që e ka në programet e saj elektorale 2005 e 2009)

Maxhoranca kërkon bashkëpunimin e opozitës për reformën zgjedhore, por shikon tek ajo një qëndrim ambig dhe inkoherent,në kundërshtim me deklaratat e saj publike.

Ministri i Shtetit për Pushtetin Vendor, Bledi Çuçi thotë në një intervistë për GSH: “Nga njëra anë PD-ja thekson se reforma duhet bërë dhe për këtë ka disa deklarata të zotit Basha. Vetë kjo parti e ka reformën administrative-territoriale edhe si pjesë të programit të sajin elektoral të viteve 2005 dhe 2009. Ndërkohë, ne plotësuam edhe kushtin e saj, për të pasur të drejtën e vetos në Komisionin parlamentar të Reformës. Atëherë unë ngre pyetjen: Pse PD-ja del kundër reformës administrative-territoriale?!”

Çuçi thekson se “paketa ligjore duhet të dërgohet për miratim në Kuvend përpara mbylljes së këtij sesioni parlamentar”, ndërsa shton se letra e fundit që kryeministri Rama i dërgoi kryetarit të Partisë Demokratike, Lulzim Basha, është një dëshmi e prekshme e këtij vullneti të palëvizshëm të mazhorancës qeverisëse.

Në ftesën që i ka dërguar kreut të demokratëve Lulzim Basha, Kryeministri Rama shprehet i gatshëm për t’u takuar me rivalin e tij dhe për diskutuar çështjet e e rëndësishme të vendit. “Lejomëni t’ju shpreh gatishmërinë time dhe për t’ju takuar sy më sy nëse ju do të donit të ndanit me mua cfarëdo shqetësimi lidhur me këtë cështje me interes kaq të vecantë për të gjithë. Për të sotmen dhe për të ardhmen e Shqipërisë”, ka nënvizuar Rama në letrën e tij që mban datën 21 mars 2014. I.K