Shpërblimet e fundvitit, Flekenshtajni dhe Frankenshtajnët

Ky vit i ri po vjen me disa shpërblime. Në kuptim e parë të fjalës, kemi një shumë shpërblimesh që ka caktuar qeveria, për disa kategori dhe shtresa të caktuara. Një shumë padyshim modeste, që më tepër duhet parë si një sinjal se ndoshta për gjendjen ekonomike paska pak dritë në fund të tunelit. Sa për kujtesë, vitin e kaluar nuk pati shpërblime të tilla, ndërsa në kapërcyellin e 2012-2013’ës, qeveria e Berishës dhe Financat e Ridvan Bodes u detyruan të shtynin me ditë të tëra dhënien e rrogave për buxhetorët në janar, derisa u gjetën të hollat.

Padyshim ky enumeracion fundvitesh nuk simbolizon ndonjë kreshendo të hatashme, por një tregues për një tendencë pozitive në financat e shtetit. Një tjetër risi e këtyre shpërblimeve janë “të dalluarit”. Nuk është sekret se qeveria ka një “bravo” për policinë rrugore, kërkon të përçojë një mesazh të fortë për nxënësit, studentët, mësuesit e shkollat që janë dalluar, e po ashtu për trupat e shëndetësisë.

Nuk kanë munguar batutat në rrjet se “kush do ta caktojë mësuesin e dalluar”, apo më shumë akoma, “mjekun e dalluar”, nisur nga ajo çfarë kemi akumuluar në bagazhin tonë të historive 23 vjeçare për shëndetësinë dhe arsimin.

Megjithatë, pakënaqësitë dhe ankesat do t’i vërejmë kur të dalin konkretisht.

Por shpërblimi tjetër për këtë fundvit nuk është i natyrës monetare, por politike. Sot kryetari i PD-së Basha do të takojë në Tiranë Knut Flekenshtajn, eurodeputetin e majtë gjerman, e më pas të hënën që vjen, të njohurin për shqiptarët Eduard Kukan, sllovakun e djathtë që është bërë si i shtëpisë tek ne; këto takime për t’i dhënë lëmimin e fundit skemës bamirëse “bëjmë sikur negociojmë diçka që PD të hyjë në Kuvend dhe të lërë pas bojkotin”.

U lodhën shumë të gjitha palët, për të bërë sikur i shpëtojnë namuzin PD-së; u lodh shumë edhe kjo vetë, dhe madje u rrezikua nga pakënaqësitë e brendshme ndaj një bojkoti me motivacion qesharak. E dështuar në paraqitjen e jetës politike shqiptare si gjendje lufte, u deshën disa udhëtime në Bruksel e Strasburg, u nevojit edhe mukajeti i kryeministrit Rama për të shkuar e t’i thotë BE-së, “le të kërkojnë çfarë të duan se ua plotësojmë; problemi është se nuk dinë çfarë duan”; u rrëzua skenari infantil i vizitës zyrtare të presidentes të Kosovës Jahjaga që kishte në axhendë edhe një fjalim në parlament; doli pastaj edhe nevoja e stisjes së njëfarë tryeze negociatorësh… Dhe në fund, po bihet dakord për “normalizimin e marrëdhënieve parlamentare” me miratimin e një ligji për “dekriminalizimin e Kuvendit”.

Të thuash se është e turpshme gjithë kjo histori, nuk mjafton: Më tepër, është për të ardhur keq katandisja e PD-së, në dorë të frankenshtajnit Berisha që beson se i njëjti ujë mund të kalojë dy herë nën të njëjtën urë; siç bëri me kundërshtarin Nano në 2001-in, mendoi se skema do vlejë edhe për evlatin e tij politik Basha, përballë Ramës.

Por meqë jemi tek ujrat, nuk dimë dhe mbetet për t’u parë sesa ujë do t’i hedhin ligjit të ardhshëm ende hipotetik. Sepse nëse duam vërtet një parlament të dekriminalizuar, nga ajo sallë duhet të mungojnë bashkë me shumë të tjerë edhe vetë Berisha e Basha (ky i fundit, provizorisht ka zënë një zyrë tjetër në një nga bashkitë e vendit).

Gjithsesi, kjo lojë ku edhe mazhoranca po jep një dorë për ta mbyllur, ka një të mirë me mbarimin e vet: Mbase këtej e tutje ata që qeverisin nuk harxhojnë më energji në drejtime të gabuara e të kota.

Kush dhe sa fiton shpërblim për festat e fundvitit

Pensionistët, familjet në nevojë, veteranët, policët rrugorë të kryeqytetit, mësuesit e shkollave të dalluara, nxënësit dhe studentët e ekselencës dhe disa kategori të tjera do të kenë mundësi ta festojnë Vitin e Ri me një dhuratë nga qeveria. Përmes një VKM-je, Këshilli i Ministrave ka vendosur që të shpërblejë për festat e fundvitit të gjithë ata të cilat kanë më nevojë. Ndonëse një qeverisje e majtë, jashtë vëmendjes nuk kanë mbetur as ish të përndjekurit politikë, të cilët do t’i gëzohen marrjes së një shpërblimi. Duke rikonfirmuar luftën ndaj krimit, Qeveria ka vendosur që të shpërblejë edhe familjet e punonjësve të policisë të rënë në krye të detyrës. Kështu, familjet e policëve të vrarë dhe të gjitha familjet e ushtarakëve me misione jashtë vendit do të jenë përfitues të shpërblimeve të fundvitit. Dy kategori të reja që do të mbështeten, do të jenë edhe mjekët dhe mësuesit e dalluar., të cilët do të marrin 40 mijë lekë të reja.

Vendimi

Rama tha se me këtë vendim do t’i jepet fund traditës së lëmoshave dhe mungesës së stimujve për më të mirët. “Pamë të arsyeshme të kemi një qasje të re, t’i japim fund traditës së lëmoshave dhe mungesës së stimujve për më të mirët. Ashtu sikundër meritojnë vëmendje njerëzit në nevojë, meritojnë vëmendje edhe njerëz të spikatur të kësaj shoqërie që gjatë këtij viti kanë dhënë kontribut të posaçëm. Filozofi e re në dhënien e shpërblimeve, shpërblejmë personat me aftësi të kufizuar, familjet në ndihmë ekonomike, pensionistët që janë edhe grupet sociale më vulnerabël,” tha dje kryeministri Rama.

Shpërblimet

Sa i përket kategorive që përfitojnë shpërblim për Vitin e Ri janë pensionistët kryefamiljarë, të vetmuar ose në çift, familjet në ndihmë ekonomike dhe personat me aftësi të kufizuar që marrin shpërblim prej 30 mijë lekësh ose 30 dollarësh; pensionistët shpërblim 20 mijë lekë ose 20 dollarë; veteranët e luftës dhe të përndjekurit e regjimit komunist mbi moshën 65 vjeç, shpërblim prej 50 mijë lekësh ose 50 dollarësh; për familjet e policëve të vrarë dhe të gjitha familjet e ushtarakëve me misione jashtë Shqipërisë shpërblimi do të jetë 100 mijë lekë ose 100 dollarë.

Mësuesit/mjekët

Po ashtu edhe trupa mësimore e 10-të shkollave të renditura të parat në klasifikimin e Maturës Shtetërore, do të marrin shpërblim 400 mijë lekë të vjetra ose 400 dollarë për çdo mësues. Gjithashtu edhe nxënësit e shkëlqyer, që nga pjesa e dytë e ciklit 9-vjeçar dhe për gjithë ciklin e mesëm marrin shpërblim me 50 mijë lekë ose 50 dollarë; studentët e ekselencës shpërblim me 50 mijë lekë ose 50 dollarë; trupa e 3 shërbimeve më të mira shëndetësore me 400 mijë lekë për secilin ose 400 dollarë. Njësia Policore e Qarkullimit të Tiranës do të shpërblehet me 400 mijë lekë për individ ose 400 dollarë; si dhe njësia e Parkut Kombëtar i Divjakës, do marr shpërblim me 400 mijë lekë ose 400 dollarë për person.

Dhjetë shkollat publike të renditura të parat

Qeveria ka vendosur që të shpërblej edhe mësuesit e 10 shkollave që kanë rezultatet më të larta në provimin e Maturës Shtetërore. Katër prej tyre janë në kryeqytet, dhe nga një në qytetet, Vlorë, Durrës, Korçë, Elbasan, Shkodër dhe Lushnjë.

“Ismail Qemali” Tiranë

“Sami Frashëri” Tiranë

“Qemal Stafa” Tiranë

“28 Nëntori” Shkodër

“Petro Nini Luarasi” Tiranë

“Ali Demi” Vlorë

“18 Tetori” Lushnjë

“Naim Frashëri” Durrës

“Themistokli Gërmenji” Korçë

“Dhaskal Todri” Elbasan

Filozofia e shpërblimit

Kryeministri gjatë fjalës së tij kërkoi të theksonte se qeveria këtë herë është përpjekur që të shpërblejë shtresat që kanë më shumë nevojë, por sidomos ata që janë dalluar në përpjekjet e tyre. Në këtë grup ishin mësuesit që patën rezultatet më të larta. Njësia e qarkullimit të policisë rrugore, nxënësit dhe studentët më të mirë, apo dhe tre shërbimet më të mira shëndetësore të vendit.

Administrata

Ashtu si një vit më parë edhe këtë vit, e sakrifikuara mbetet administrata publike. Qeveria nuk ka menduar të ketë ndonjë shpërblim për punonjësit e shtetit të cilët janë afro 110 mijë në gjithë vendin. Edhe këtë vit buxhetorët e shtetit do të festojnë me rrogën e zakonshme.