Rama: Marrja e Eurobondit të ri konfirmim për ecurinë e reformave

Kryeministri Edi Rama e konsideroi si sukses shlyerjen e Eurobondit dhe marrjen e një të riu. Gjatë një takimi me shoqatat e biznesit, kreu i qeverisë, theksoi se emetimi i Eurobondit 5-vjeçar me normën e interesit 5,75%, një normë më e ulët nga sa pritej në fillim të procesit konfirmoi ecurinë pozitive të reformave.

“Përfundoi me shumë sukses operacionit i Eurobondit, ku Shqipëria doli në tregjet ndërkombëtare dhe morëm atë që kërkonim në raport me Eurobondin e vjetër. Kemi tani një Eurobond të ri me 450 milionë euro dhe me 5,75% interes, që është treguesi më kuptimplotë i punës dhe imazhit që ka ndërtuar vendi në të gjithë këtë rrugëtim”, theksoi ai.

Rama shprehet se fakti që tregjet përgjigjen pozitivisht në një klimë të pafavorshme është përgjigja më e mirë dhe më solide për të gjitha pretendimet se ekonomia nuk po ecën mirë.

“Ne po bëjmë reformat e duhura, pikërisht pse konsolidimi i financave po vazhdon, pikërisht pse ekonomia po jep sinjale të qarta qëndrueshmërie dhe rritje të qëndrueshme një çështje tjetër madhësia e rritjes, përgjigja nga tregjet financiare ishte edhe më e mirë nga sa e parashikonin edhe më optimistët në grupin e punës për Eurobondin”, deklaroi Rama.

Në takimin për informalitetin ishin të pranishëm edhe ministri i Ekonomisë, Arben Ahmetaj dhe ai i Financave, Shkëlqim Cani. /Dita/