Rama: Mazhoranca do të votojë në bllok reformën

Kryeministri Rama doli në një konferencë për shtyp ku deklaroi se do të përpiqet deri në momentin e fundit që të gjejë konsensusin për të miratuar reformën në drejtësi.
Ai tha se “Aleanca për Shqipërinë Europiane” do të votojë në bllok për miratimin e reformës në drejtësi.

“Ne 140 deputetët jemi përballë një zgjedhjeje shumë të qartë. O të votojmë në emër të Shqipërisë. O të votojmë në emër të frikës nga drejtësia. ASHE do të votojë në bllok. Po dolëm faqebardhë për të çelur rrugën e negociatave për anëtarësimin në BE dhe për t’u përgatitur që të ulemi me dinjitet ose të votojmë për faqen e zezë të Shqipërisë dhe ta bëjmë Shqipërinë të damkoset. ASHE do votojë në bllok për ta çuar faqebardhë vendin. Kryetari i PD të sillet si lider.
Kemi dhënë konsensus për gjithçka të negociueshme. Nuk mund t’ia plotësojmë kërkesën opozitës për t’iu bashkuar në një front kundër SHBA dhe BE. PD ka fituar të gjithë atë që i takon dhe sinqerisht e komplimentoj Bashën për rezultatet që ka merituar. Por PD nuk mund të marrë atë që nuk i takon. Thirrja ime është as blerje dhe as dhunim konsensusi. Kërcënim, shantazh, djegie mandatesh, janë shprehja alarmante e kulturës diktatoriale. Unë jam deri në orën 10:00 të 21 korrikut për konsensus. Kam bërë gjithçka për konsensusin. Kjo nuk është reforma ime apo e një krahu politik”, tha Rama për mediat.

Rama tha se negociatat me PD kanë vijuar deri në orën 3 të mëngjesit dhe propozimi hibrid i zonjës Nuland ishte i vetmi për të cilin u negocioua.
“Nuk mund të kalohet vija e kuqe e vendosur nga SHBA dhe BE”, tha Rama.