Rama: Opozita po kryen vetëvrasje politike

Kryeministri Edi Rama, i ftuar këtë të enjte në emisionin “Open” të Eni Vasilit, e konsideroi krizën aktuale politike diçka të përsëritur.

Por për kryeministrin ndryshe nga kriza e vitit 2017, kur opozita protestoi me çadër në bulevard me të njëjtat kërkesa, në vitin 2019 opozita është e vendosur për t’i shkuar deri në fund rrugës ‘qorre’. Ai theksoi se kjo sjellje do të sjellë vetëvrasjen politike të PD dhe LSI.

Rama deklaroi: “Nuk është e re kjo situatë është e përsëritur, e kemi parë të gjithë dy vite më parë. ka ndryshuar forma, nuk është më një çadër që i mbledh njerëzit nën strehën e saj, por është një parti që ka braktisur Parlamentin pa kthim, ka veshur ‘jelekët e verdhë’ të një lëvizjeje që është karakteristike e grupeve që krijohen për t’u bërë vizibël, por asnjëherë e partive politike, dhe kërcënon se nuk do të ketë zgjedhje nëse nuk bëhet siç duam ne.

Ndryshimi është në faktin se jemi në kushtet kur ka një vendosmëri për t’i shkuar deri në fund një rruge qorre që në këndvështrimin tim është vetëvrasje politike dhe nga ana tjetër thirrjeve për dialog dhe për të diskutuar pa kushte i vjen e njëjta përgjigje e përsëritur pa pushim dhe destinuar që të mbetet një kllapë brenda së cilës ky grupim politik partish është i destinuar të tretët”, tha Rama.