Rama: Referendum për mandatin tim në krye të PS-së

Partia Socialiste ka mbledhur sot Asamblenë Kombëtare, ku do të diskutohet për zgjedhjet e reja në parti dhe rinovimin e strukturave dhe anëtarësimet e reja.

Ne fjalen e tij para Asamblese, Kryeministri Edi Rama kërkoi sot referendum popullor për mandatin e tij në krye të Partisë Socialiste. Ai tha se duhet të jenë socialistët e gjithë Shqipërisë dhe jo vetëm asambleja ajo që vendos nëse do vijojë të jetë apo jo në krye të PS.

Kjo kërkesë e Ramës është edhe një përgjigje për Ben Blushin e një grup deputetësh që kërkojnë zgjedhje për kryetarin e PS.
“Duhet të jemi një parti e vetme me një vizion që ndan të njëjtin qëllim, që lufton mbi të njëjtin program dhe natyrisht që mundohet të adresojë të gjitha faktet jo si hapësirë debati ku bashkë me ne debaton edhe Saliu në mjedisin tonë. Kjo nuk shkon, kjo nuk lejohet, nuk e lejon demokracia. Që statuti nuk është respektuar kur u zgjodha kryetar i PS, këtë nuk mund ta diskutojmë më…Rregullimi i statutit sipas modelit laburist, mandati im nuk mund të diskutohet në kongres se është marrë me 1 anëtar një votë…S’mund të shkojmë në zgjedhje pse do një grup i vogël…S’mund të hyjmë në zgjedhje të kota dhe joserioze kur ata që kemi ne përballë duan të qeverisen. Do ta them të vërtetën deri në fund. Statuti është alibi, për rrëzimin e qeverisë ndryshimin e kursit të saj. Çështjen e mandatit tim le ta vendosin socialistët në të gjithë Shqipërinë. Me votë të lirë dhe të fshehtë të shkojmë në referendum”.

Kryetar i PS-së, tha se në këto 30 muaj qeverisje kemi bërë shumë për PS-në, për Shqipërinë e sotme dhe atë të gjeneratës tjetër, por theksoi ai, në rrugën drejt zgjedhjeve të 2017-s na duhet një PS e reformuar, e ripërtërirë fizikisht, e riorganizuar territorialisht dhe mbi të gjitha e transformuar rrënjësisht në përbërjen e saj sociale.

Kjo, theksoi Rama, është rruga që PS të mund të përmbushë misionin e saj udhëheqës për të bërë shtet në këtë vend, se reformat tona kanë hapur një rrugë të re, në një të përpjetë shumë të vështirë, ku asnjë forcë tjetër udhëheqëse përveç PS-së nuk do të mund ta mbajë barrën e lidershipit.

Megjithëse, grupe të caktura do duan të na zmbrapsin dhe shkurajojnë nga rruga e reformave, vijoi kryeministri, ne do të vazhdojmë të qeverisim me kurajo dhe vendosmëri, duke zbatuar programin tonë të reformave për të rilindur Shqipërinë dhe duke fuqizuar forcën udhëheqëse të gjithë këtij transformimi, Partinë Socialiste, së cilës duhet t’i rrisim dinamikën e veprimit.
Falë kësaj pune, tha Rama, ne kemi sot një parti me shumë më pak fiktivitet se gjysëm viti më parë dhe me më shumë energji e vullnet në rrugën e reformave shtetbërëse.