Rama shkund hipotekat: Drejtorët të japin dorëheqjen brenda 24 orëve

Kryeministri Edi Rama ka mbledhur sot të gjithë drejtorët e hipotekave në kryeministri, së bashku me drejtorin e përgjithshëm të ALUIZNI-t Artan Lame dhe drejtoreshën e re të hipotekave Blerina Doracaj.

Ai i ka bërë thirrje të gjithë drejtorëve që nuk zgjidhin dot problemet e qytetarëve të japin dorëheqjen brenda 24 orësh. Ai i ka quajtur hipotekat një nga pjesët më kanceroze të sistemit të tepsisë.

Rama ka thënë se drejtorët e hipotekave janë pjesë e problemit dhe jo e zgjidhjes sepse janë larg realitetit dhe problemeve të njerëzve.

“Keni raportuar vetëm 5126 kërkesa për leje, në të vërtetë janë pesëfish më shumë. Sa larg realitetit jeni ju dhe sa larg njerëzve është kjo strukturë kaq problematike. Pavarësisht se ka një problem real me pronën, me hartat dhe dokumentacionin, struktura vetë nuk është pjesë e zgjidhjes por pjesë e problemit.

Vështirësitë objektive janë njëra anë dhe vështirësitë subjektive që i krijohet njerëzve janë një gjë tjetër. Këto vështirësi janë një mal që njerëzit e zakonshëm nuk e kalojnë dot pa kaluar në vrima, në labirinte etj. Nëse doni t’i jepni vetes të dilni nga kjo punë minimumin e dinjitetit jepni dorëheqjen. Nuk me intereson fare nga vini, nga partia, shoqëria apo krushqia”, ka thënë kryeministri Edi Rama.