Rama: Unë dhe babai, bindje të ndryshme. Ja ç’dua të bëj në jetë

Në një intervistë për portalin gjerman Freitag, kryeministri Edi Rama flet për nënën e babanë e tij.

“Mamaja ime është gruaja më e mrekullueshme që kam njohur ndonjëherë,” thotë Rama.

Ndërsa për babanë shprehet: “Dikush, që kishte bindje të tjera nga të miat, por që njëkohësisht më lejonte të isha ndryshe nga ai”.

Rama flet për kuzhinën shqiptare, duke thënë se nëse gatuhet siç duhet, ajo është më e mira në botë.

I pyetur për emigrantët shqiptarë, ai thotë se ata janë një burim i mrekullueshëm për të gjithë ata që i presin.

Ai thotë se si emigrantë, shqiptarët e kanë treguar se sa të aftë janë.

I pyetur nëse emigrantët janë një humbje e madhe për vendin e tij, ai thotë: “Jo, historia e ka treguar se emigrantët mund të përdorin vendin që i pret njësoj si atdheun e tyre. Por natyrisht populli ynë ka të drejtën për një shtet që funksionon më mirë, që u ofron të gjitha mundësitë”.

Për Ramën, Angela Merkel është i vetmi person që mund të udhëheqë Europën, kurse Serbia “është një armik shumë i dashur”.

Kurse për Kosovën ai thotë se ajo është “toka dhe shpirti shqiptar”.

Por cila është dobësia e Edi Ramës?

“Kam qenë dhe jam i keq në matematikë”.

I pyetur se ku e sheh Shqipërinë pas dhjetë vitesh, ai thotë se “përgjigja e qartë do ishte në BE”.

“Por unë dua ta provoj ndryshe: ëndërroj për një Shqipëri, që është e bukur dhe ku njerëzit zhvillohen pozitivisht”.

Por ku e sheh veten Edi Rama pas dhjetë vitesh?

Ai thotë se nëse do i lejohej të zgjidhte, do donte të jetonte në një studio në një fshat të izoluar, një studio e mbushur me artistë, filozofë, dizajnera dhe shefa kuzhine.

“Po, kjo do ishte ëndrra ime”.