Rama: Vota për PD, votë për të mbajtur në punë kryetarin e papunë

Kryeministri Edi Rama ka thënë se vota për kandidatët e djathtë nuk është votë për projektet konkrete për të ndryshuar qytetin tuaj, por thjesht për të mbajtur me punë kryetarin e mbetur pa punë të Partisë Demokratike.

Deklarata e tij u bë nga 2 qytete, bastione të demokratëve, Devolli dhe Përrenjasi.

Rama, i shoqëruar nga kreu i LSI-së Ilir Meta, kërkoi këtë të dielë votat për kandidatët e majtë, Miranda Rira dhe Armen Qaja.

“Ju e keni parë që dalin te SHQUP-i dhe na akuzojnë, më akuzojnë mua në mënyrë të veçantë, se po i kërcënoj qytetarët se po votuat kandidatët e Partisë Demokratike do të mbeteni pa ujë, pa drita e kështu me radhë. Nuk është kështu.

Unë kam detyrimin t’ju them një të vërtetë të thjeshtë e të madhe, vota për kandidatët e Partisë Demokratike është votë për të mbajtur me punë kryetarin e mbetur pa punë të PD-së, është votë për të vazhduar për të ushqyer një politikë absurde konflikti me qeverinë. Dhe për fat të keq këtë e paguajnë në kurriz komunitetet, e paguajnë familjet, e paguajnë të moshuarit, më të rinj”, tha Rama.

Votën për kandidaten e LSI-së për Bashkinë e Përrenjasit e kërkoi vetë kryetari Meta, i cili tha se Miranda Rira është zgjedhja e duhur për qytetin.

“Kandidatja Rira do realizojë atë cka ju prisni për bashkinë tuaj të re. le ta votojmë, është zgjedhja dhe drejtimi i duhur për Bashkinë e Përrenjasit. Sfida e saj ta bëjë bashkinë e re që të rinjtë të mendojnë ta ndërtojnë të ardhmen e tyre këtu”, u shpreh Meta.