OKB bëri publik të premten raportin “Situata e të Drejtave të Njeriut në Republikën Islamike të Iranit” të raportuesit të posaçëm, Javaid Rehman.
Sipas raportit, vitin e kaluar ka pasur “kufizime në rritje” mbi të drejtat e lirisë së shprehjes dhe lirive të tjera në Iran. Për më tepër, raporti konstaton edhe problematika në gjykimet e Iranit dhe kritikon Teheranin për numrin e lartë të ekzekutimeve, përfshirë këtu edhe ekzekutimin e të paktën shtatë fëmijëve.
Në raport, Rehman shpreh shqetësimin se Irani ka më shumë se 80 vepra penale që janë të dënueshme me vdekje, përfshirë këtu tradhtinë martesore, homoseksualitetin, posedimin e drogës, “luftën kundër Zotit”, korrupsionin, blasfeminë dhe fyerjen ndaj profetit Muhamed.
Shumica prej veprave që në Iran ndëshkohen me vdekje, sipas Rehman, nuk konsiderohen krime serioze sipas Konventës Ndërkombëtare për Liritë Civile dhe Politike.
Rehman theksoi faktin se numri i ekzekutimeve në Iran gjatë vitit 2018 ishte më i ulëti që prej vitit 2007, por shtoi se megjithatë numri i ekzekutimeve “vazhdon të jetë ndër më të lartit në botë”.
Në raportin e OKB-së, Teherani po ashtu kritikohet për trajtimin që u bën minoriteteve etnike, raporton Dita, duke iu referuar mediave nderkombetare.
e.ll./dita