Gjyqi për dëmshpërblim, raporti i psikologes: Fullani ka ankth dhe mungesë oreksi

Pas shkarkimit nga detyra si Guvernator i Bankës së Shqipërisë, Ardian Fullani ka bërë gjumë të shqetësuar me ëndrra e ankth, ka pasur mungesë të theksuar të oreksit dhe i është ulur vetëvlerësimi.

“Panorama” shkruan sot se këto janë disa nga konstatimet e psikologes Jonida Haxhiu, sipas së cilës, dëmi psikologjik, moral e ekzistencial i shkaktuar tek ish-Guvernatori, pas shkarkimit nga puna, është në nivel maksimal. Raporti psikologjik është administruar dje si provë nga Gjykata Administrative, në gjyqin ku Fullani ka paditur Bankën e Shqipërisë dhe Kuvendin e Republikës.

Ish-Guvernatori kërkon shfuqizimin e vendimit për shkarkimin e tij dhe dëmshpërblim financiar e moral. Një nga metodat e përdorura për raportin ka qenë edhe ajo e intervistimit, gjatë së cilës Fullani ka rrëfyer përjetimet e tij pas vjedhjes së 713 milionëve në BSH, ngjarje rreth së cilës ai u deklarua i pafajshëm.

Në vijim zbardhen pjesë nga raporti psikologjik, i përbërë nga 19 faqe në total:

-Paditësi është ndjerë gjithnjë i pafajshëm dhe në asnjë rast nuk kishte menduar se mund të kishte ndonjë implikim të tij në lidhje me çështjen e vjedhjes në Bankën e Shqipërisë. Në çdo moment gjatë intervistave shqetësimi kryesor, ndërsa u përgjigjet pyetjeve, ka rezultuar të jenë ngjarja e ndodhur dhe evidentimi i masave që duhej të merreshin për të mos rrezikuar stabilitetin ekonomiko-financiar të vendit. …

Ai vazhdon të shprehë keqardhje të thellë që kjo ngjarje ndodhi në institucionin që ai drejtonte, suksesit dhe mbarëvajtjes së të cilit ai i ka kushtuar pothuajse gjithë jetën e tij profesionale.

-Insiston të përsërisë faktin se ngjarje të tilla, në përmasa të tilla, kanë ndodhur dhe në shumë banka të tjera qendrore, si Banka e Anglisë, Banka e Francës e shumë banka të tjera të rëndësishme në botë, por analizimi i situatës dhe nxjerrja e përgjegjësive ka qenë krejt e ndryshme nga ajo që ndodhi në Shqipëri.

-Stresi ndikon te të gjitha organet jetësore dhe jep një sërë problemesh, si dhimbje koke, këputje fizike, lodhje etj. Z. Ardian Fullani thotë se këto simptoma e kanë shoqëruar gjithë kohën dhe vazhdojnë të jenë të pranishme në një intensitet të konsiderueshëm.

-Pagjumësia është një tjetër simptomë shoqëruese e situatave stresante. Është krejt normale që në ngjarje të rënda të përjetohen probleme të mëdha me gjumin, vështirësi për të zënë gjumë, gjumë i parehatshëm dhe ndjesi ankthi, apo edhe kur arrinte të flinte, situata që vazhdojnë të jenë prezente për shumë kohë pas ngjarjes.

-Stresi ndikon menjëherë edhe në zakonet e ushqyerjes së individit që e përjeton atë. Ai mund të shfaqet me shtim ose reduktim të oreksit. Ardian Fullani thotë se kjo situatë stresante ka sjellë reduktim domethënës të oreksit dhe mungesë totale e dëshirës për t’u kujdesur për veten.