Inate për karrierë në çerdhen e Ferrit (dhe një bisedë e imamit Daci me familjarin e viktimës)

Mund të jenë larguar drejt Sirisë me mendimin se e kanë hedhur njëherë e mirë pas krahëve pjesën e tyre shqiptare, por xhihadistët shqiptarë pranë grupeve radikale islamike nuk ngurrojnë të vijojnë inatet “shqiptare” e madje të përpiqen për karrierë.

Siç njofton Tv Klan duke cituar burime në SHISH, Almir Daci, i riu nga Pogradeci që lufton për ISIS dhe ka kërcënuar Shqipërinë përmes mesazheve video, dyshohet të ketë urdhëruar vrasjen e një shqiptari tjetër që shkoi në Siri.

Shërbimi Informativ ka përgjuar telefonatat e disa personave që gjenden në Shqipëri, me të cilët komunikon Almir Daci dhe anëtarët e grupit që ai drejton në Siri. Në këto telefonata, që prej vajtjes së bashkatdhetarit Shkëlzen Dumani në 2013-n, flitej për një shumë parash që ai kishte me vete. Burime të besueshme të inteligjencës thanë se Dumani kishte marrë me vete paratë e shtëpisë që kishte shitur; rreth 50 mijë dollarë.

Nga përgjimet kuptohet se grupi i shqiptarëve të drejtuar nga Almir Daci nuk e ka mirëpritur Dumanin dhe po planifikon për t’i marrë paratë. Pas këtyre bisedave nuk është folur më për të riun me origjinë nga Dibra dhe më vonë u raportua se ai u vra gjatë luftimeve përkrah ISIS.

Përgjimet zbulojnë gjithashtu se Almir Daci është vënë në komandën e shqiptarëve në Siri dhe po rivalizon kosovarin Lavdrim Muhaxheri, i cili, në hierarkinë e ISIS ka gradë më të lartë dhe është më i besuar tek drejtuesit e Shtetit Islamik.

Edhe në intervistën e një ish luftëtari xhihadist të penduar që ishte rikthyer, në emisionin e Ylli Rakipit në Ora News, binte në sy fakti që ai nuk kishte marrëdhënie të mira me disa shqiptarë të tjerë. Duket se edhe në strofullën e vdekjes, aty ku jeta mund të mbarojë çdo çast, bëhen përpjekje për karrierë… 

*********

Fotot poshtë, Almir Daci, para dhe pas ikjes në Siri

Si njoftohen prindërit e viktimave dhe biseda e Almir Dacit me një prej familjarëve

Në shtëpitë e atyre që vriten në Siri, askush nuk pranon që të flasë për gazetarët sepse, siç shpjegojnë ata, asnjë nuk i kupton.

Ka raste kur familjet e dinë ku janë fëmijët dhe çfarë rruge kanë marrë.

Në rastin e Diamant Rashës, pershembull, një nga shqiptarët e parë të vrarë atje, prindërit nuk kanë pritur askënd për ngushëllime, pasi siç thoshte i ati, djali i tij është sheit, që në shqip do të thotë “dëshmor në rrugën e Zotit”.

Në familje të tjera nuk kanë qenë dakord me zgjedhjen e djemve.Në këto raste edhe njoftimet nga siria për vdekjet vijnë ndryshe.

Psh, një tjetër viktimë shqiptare në Siri është Denis Jangulli, një ish-farmacist. Një ditë ai i kërkoi të ëmës leje për t’u larguar në luftë, leje të cilen nuk e mori. Pas kësaj tha se po nisej në pelegrinazh.

Në shtëpinë e Denis Jangullit, njoftimi për vrasjen e tij erdhi me mesazh telefonik nga një numër i panjohur: “Denisi ndërroi jetë në Siri. Mos bëni asnjë gjë që Denisi nuk do të dëshironte”.

Në raste të tjera, të afërmit arrijnë të flasin më gjatë me shqiptarë të tjerë që gjenden aty, sidomos me ata që i fajësojnë për rekrutimin.

Më poshtë është një bisedë e imamit të vetëshpallur të Leshnicës Almir Daci, me të afërmit e Ervis Alianjit, të cilëve u komunikon se Ervisi u vra në Siri nga një shpërthim.

Almir Daci: Ne kemi erdhur këtu për të ndihmuar muslimanët që po masakrohen dhe gratë që po torturohen. Se kjo është prej fesë islame që të ndihmohen muslimanët.

Kushëriri i Ervis Alianjit: Po Mili…

Almir Daci: Nuk është e lehtë dhe ne morëm parasysh çdo gjë. Këtu normalisht edhe unë një ditë jam i rrezikuar, se një ditë do të vritem, por nuk kam frikë nga kjo, unë dhe të tjerët se duam të japim gjithçka për Allah. Që Allahu të na shpërblejë me xhenetin më të lartë në botën tjetër. Dhe kjo është ajo që na ka nxitur të gjithëve që të vijmë këtu. Pra çdo gjë ka lidhje me urdhrat që ka dhënë Allahu në Kuran.

Kushëriri i Ervis Alianjit: Po po.

Almir Daci: Visi nuk ju tregoi se ku ishte. Edhe mua më mbeti tani kjo përgjegjësi, që t’ju tregoj. Të mos ua mbaj të fshehur. Se u vra Visi kjo nuk është për fajin tim, se nesër do vritem edhe unë. Dhe dje u vra edhe Bledi i Gramozit, edhe Bledin unë e mashtrova? Ai ishte në Tiranë dhe unë në Pogradec, prandaj kuptojeni mirë.

Kushëriri i Ervis Alianjit: Poo.

Almir Daci: Unë e di që ju keni të drejtë të mërziteni për Visin, se ai është njeriu tuaj.

Kushëriri i Ervis Alianjit: Po është njeriu jonë, si të mos mërzitemi, nuk kthehet më apo jo

Almir Daci: Por ama nuk mund të jem unë përgjegjës për çdo njeri që është këtu me mua prej Pogradeci apo prej qyteteve të tjera. Mirëpo çfarë t’ju bëj unë. Kjo është e vërteta.

Kushëriri i Ervis Alianjit: Mili sa kohë ka është vra Visi, po ti a e pe në atë moment?

Almir Daci: Ai u vra nga një shpërthim i fuqishëm dhe nuk u gjet asnjë pjesë e trupit. Dhe ai nuk ka varr as këtu. Çfarë trupi t’ju japim, hë më thuaj ti.

Kushëriri i Ervis Alianjit: Po sa kohë ka o Mili?

Almir Daci: Ka disa muaj, por unë nuk e merrja dot guximin t’jua thoja se e dija që kjo është gjë e rëndë për ju. Mirëpo si ndodhi dhe kjo gjë me Bledin e Gramozit, thashë t’ju them, që ta dini më mirë të vërtetën.

Kushëriri i Ervis Alianjit: Mili po pse nuk na ke thënë më parë. Po ti a ishte në momentin e fundit?

Almir Daci: Kjo është e vërteta. Jo nuk kam qenë me të në ato momente. Se isha në një vend tjetër. Si tua thoja? E dija që ishte e rëndë.

Kushëriri i Ervis Alianjit: Po amanetet që i kishte lënë, kujt ja la o Mili?

Almir Daci: Amanetet i lë çdokush prej nesh, që kur është gjallë. Ai ka thënë të mos e qani, sepse ai është shehid, dmth një prej njerëzve më të mirë xhenet, dhe nuk lejohet të qahet për ta. Mos mbani zi, dhe mos bëni të shtata e as të dyzeta se këto nuk lejohen në islam. Nëse doni ta takoni, duhet të faleni që ta takoni në botën tjetër. Mos fajësoni njeri për vendimin e tij. Ai vendosi vetë të shkonte në Siri dhe të ndihmonte muslimanët. Ndaj bëjani hallall.

Almir Daci: Hej a do vish këtej, nis e ke seriozisht nuk është problem fare. Prit biletën për në Turqi, hajde njëherë në Turqi pastaj flasim se si. Pastaj sikur kishe përmednur xhaminë e Unazës së Re. O vëlla ata kam dëgjuar që bashkëpunojnë me shtetin dhe ka spiuna po fole atje se dua të shkoj në Siri, të fusin brenda që aty. Nuk janë njerëz të mirë, sidomos imami, se ashtu hiqen ata si të devotshëm, por nuk janë të tillë. Prandaj ata nuk kanë lidhje fare. Kjo është e vetmja rrugë që ne kemi ardhur këtu të gjithë. Kemi prerë biletën për në Turqi, pastaj këtej është kollaj fare. Kuptove nuk ka rrugë tjetër, bëj kështu si të thashë, hajd mirupafshim.

Kushëriri i Ervis Alianjit: Ok mirë, flm shumë. / Dita /