Reagimi i Ballës: Gjyqtari Hado dhe Shkëlzeni do e marrin përgjigjen pas 23 qershorit

Nga Taulant Balla

E kam thënë prej ditës së parë kur filluan këto procese qesharake kundër opozitës, se nuk kam asnjë dyshim për vendimmarrjen e turpshme në Gjykatën e Tiranës, e cila është kthyer në një aneks të kuzhinës së punëve të pista të Sali Berishës. Mjafton të thuash se aktualisht kjo Gjykatë drejtohet nga asistenti i vajzës së Kryeministrit zonjës Argita Berisha (Malltezi), kuptohet qartë se çfarë vendimesh merren aty.

Sot gjyqtari Ridvan Hado, mbi të cilin rëndon barra e rëndë e mosdënimit të autorëve të tragjedisë së Gërdecit, kreu shërbimin e radhës ndaj familjes në pushtet.

Pas një procesi gjyqësor tërësisht qesharak, ku gjyqtari prej ditës së parë u pozicionua qartë si një avokat i Shkëlzen Berishës, sot ky gjyqtar, Ridvan Hado, vendosi të vlerësojë se shqetësimet mendore të djalit të Kryeministrit, Shkëlzen Berisha, të shkaktuara nga akuzat e mia për korrupsion dhe pasurim të paligjshëm kushtokan 2 milionë lekë.

Pra akuzat e mija, të bazuara në deklarimet zyrtare të pasurisë së vetë Shkëlzen Berishës, i paskan shkaktuar djalit të Kryeministrit shqetësime mendore dhe se rregullimi mendor apo pastrimi moral i Shkëlzen Berishës kushtojnë 2 milionë lekë.

Dua të sqaroj sot për mbarë opinionin publik se ky gjyqtar i keqpërdorur në rastin e dënimeve qesharake për tragjedinë e Gërdecit, megjithëse i bindur në vërtetësinë e provave të paraqitura për pasurimin e paligjshëm të djalit të Kryeministrit, la të kuptohej se kreu edhe këtë shërbim me qëllim marrjen në konsideratë të kërkesës së tij nga babai i Shkëlzenit për një vend të lakmuar në Gjykatën e Apelit apo të Lartë. Sepse në Shqipërinë e marrë peng nga Saliu, gjyqtarët promovohen në rangje më të lartë, vetëm pasi kanë dhënë prova besnikërie ndaj familjes. Ridvan Hado i dha qartë provat e besnikërisë, tani pret gradimin nga babai i Shkëlzenit.

Këta lloj gjyqtaresh, me vendosjen në shërbim ndaj familjes në pushtet, mundohen të mbulojnë sigurisht edhe dosje të zeza vendimesh të padrejta dhe të njëanshme, në dëm të drejtësisë dhe të qytetarëve të thjeshtë.

Si ka mundësi që një gjyq për çështje pronësie apo për largim të padrejtë nga puna zgjat me vite, ndërsa gjyqi në fjalë nuk i mbushi as 20 javë nga dita e depozitimit të padisë. Si ka mundësi që kur paditës janë qytetarë të thjeshtë, Ridvan Hado i cakton seancat një herë në 3-4 muaj, ndërsa kur paditës është djali i Kryeministrit seancat i caktonte çdo javë.

I them sot Shkëlzen Berishës se unë, Taulant Balla, nuk tërhiqem nga deklaratat e mija dhe se pas 23 qershorit i bindur të jetë babi yt, por edhe ju kalamajtë e babit, se do t’i zbardhim një për një para shqiptarëve të vërtetat e pasurimit tuaj të paligjshëm.

I them sot gjyqtarit Ridvan Hado se shteti ligjor do të vendoset në Shqipëri dhe se Shqipëria ka nevojë për gjyqtarë të paanshëm dhe të drejtë, jo për frikacakë dhe lëpirës pushteti.

Nuk jam i shqetësuar për këtë keqpërdorim të fundit kundër meje personalisht, por nuk do të harroj kurrë dënimet qesharake të Ridvan Hados për tragjedinë e Gërdecit.

Sot për shkak të këtij gjyqtari pushtetlëpirës biznesmenët dhe ushtarakët e korruptuar që vranë 26 shqiptarë në Gërdec bredhin të lirë nëpër kafenetë e Tiranës, ku takohen përsëri me trurin e fabrikës së Gërdecit: Shkëlzen Sali Berishën.

Prandaj, vendosja e drejtësisë për tragjedinë e Gërdecit dhe për vrasjet e 21 Janarit, janë gurët e themelit të rilindjes së drejtësisë në Shqipëri.

Rilindje për drejtësinë në Shqipëri!

Rilindje për Shqipërinë me 23 Qershor!