Rebelë të lodhur të kauzave të munguara

Më në fund, edhe prokuroria ra në kthetrat e mafias shtetërore. Rezistenca e saj mesa duket nuk zgjati më shumë se 20 muaj. Fakti që organi i akuzës nuk u bind nga versioni i deputetit Doshi për tentativë vrasjeje ndaj tij, të urdhëruar nga kryetari i Kuvendit, por përkundrazi, pas shumë ditësh hetime intensive u bind se kjo ishte një sajesë (për shantazh politik, ka deklaruar mazhoranca), ka mjaftuar që për Partinë Demokratike, prokuroria të quhet e kapur nga “krimi politik”. Sigurisht, nëse procedurat parlamentare për miratimin e kërkesë-arresteve për deputetët Doshi e Frroku vijojnë deri në fund, sërish fjalën e fundit e ka Gjykata e Lartë. Por deri sa drejtësia ta thotë fjalën, opozita nuk ka ndërmend të presë por do vazhdojë protestat për… për çfarë? Për dekriminalizimin e parlamentit dhe institucioneve të tjera shtetërore. Do ishte logjike që në vazhdën e qëndrimeve të veta, PD të kërkojë edhe dekriminalizimin e prokurorisë. Sepse me “rregull treshi”, tani edhe Adriatik Llalla dhe prokurorët e tjerë janë vegla të mafias.

Njeriu i zakonshëm nuk mund të rrijë pa bërë pyetjen: Si ka mundësi që për këtë parti, pavarësisht nëse është në opozitë apo në pushtet, pavarësisht se kryeprokurorët i ka zgjedhur dhe i ka votuar vetë, rregullisht këta të fundit i dalin “armiq të klasës”, dhe për të arritur në këtë konkluzion nuk kalojnë më tepër se dy vjet? Si ka mundësi që kjo parti bën të pamundurën për t’i dështuar dhe diskretituar kauzat e veta, duke e bërë fytyrën rrogoz në kërkim të ndonjë deklarate të nxituar politike nga jashtë, për ta shitur si qëndrim të bashkësisë ndërkombëtare, por që menjëherë i plas si tullumbace?

Është e qartë se basti (deri tani) i gabuar i Berishës, dhe për zgjatim politik edhe i Bashës, ka qenë shfrytëzimi këtij rasti të ditur prej tre e kusur muajsh për të goditur Metën si mbështetje e mazhorancës. Kërkimi i këtyre “shortcut-eve” për të ardhur në pushtet teksa e kanë partinë çorap, është qesharak, aq më tepër kur dosje të qepura keq si çështja “Doshi” çmontohen ende pa nisur. Nga njëra anë, mund të thuhet se ky është një përparim goxha i madh për PD-në. Dikur, rrugën e shkurtra i kërkonte me tanke dhe arkivole brenda kryeministrisë, tani me “revolucione paqësore”. A është ky një evoluim i vullnetshëm, apo i detyruar ngaqë me kalimin e kohës, faktori ndërkombëtar ja ka bërë të qartë Berishës se ç’e pret nëse vazhdon të luajë luftash si dikur, kjo është temë tjetër. Por edhe këtë herë, PD zgjodhi kauzën e gabuar.

Dhe tani ka mbetur pa kauzë. Është thënë dhe më herët, që opozita ka patur potencialisht mjaft arsye për të thërritur njerëzit e saj dhe gjithë të tjerët në protesta. Ironikisht, mbase edhe shumë socialistë të zhgënjyer, që nuk do ua merrte mendja se Edi Rama do t’u thoshte një ditë, “nuk i heq demokratët nga puna, sepse nuk jam si Saliu”. Arsye që variojnë nga pakënaqësitë ekonomike, premtime të pambajtura, deri tek aspekti “represiv” i disa reformave të rëndësishme për vendosjen përfundimtare të zbatimit të ligjit. Por nga njëra anë ta akuzosh Metën se është aq i fuqishëm sa të pengojë hetimet, pastaj të iniciosh një mocion mosbesimi, pastaj të mos e votosh fare iniciativën tënde, pastaj të kërkosh dorëheqjen e tij (duke e ditur se nëse ai është kaq i fuqishëm, a nuk do ndikojë po njësoj mbi drejtësinë?!), pastaj të thërrasësh në ndihmë ndonjë deklaratë të huajsh që qortojnë Metën…

Dashamir Shehi, zëri i kthjellët dhe pa doreza i së djathtës, e tha hapur: Opozita ka arsye të tjera për protesta, jo sherret brenda mazhorancës që precipitojnë në ngjarje të tilla. “Nëse PD nuk ka besim as tek këta prokurorë e gjykatës shumicën e të cilëve i ka zgjedhur vetë…”, nënvizoi ai. Por zëra si i Shehit, më tepër i bëjnë nder opozitës dhe ja “rregullojnë biografinë” në sytë e publikut, sesa dëgjohen dhe merren seriozisht brenda rradhëve. Dhe kështu si po venë punët, tani që edhe prokuroria rezultoi pjesë e mafias për PD-në, vetëm një hap ka mbetur pa hedhur selia blu: Të shpallë Bujar Nishanin horr bulevardi! E paimagjinueshme vërtet, por çfarë s’bën vaki…