Letër e nënshkruar,
Kol Rrudha
Zoti Kryeredaktor! Tërheq vëmendje shqyrtimi në “Dita” i poetit të shquar e gazetar njëkohësisht, mbi: “Nëse PS ka apo s’ka 150 mijë anëtarë”, ku çështja shkon deri edhe në anulim kongresi. Pyetja që më vjen për Arben Dukën e madh, në thjeshtësinë e vet, është, gjithnjë në referim të interesave shoqërore e kombëtare: nëse vërtet ndodh, ku gjendet e dobishmja në këtë zhvillim? Këtu e gjej arsyen të sugjeroj, jo kongresi, por referendumi duhet anuluar. Sa më parë, më mirë. Këmbëngulja për referendum, e mbështetur dhe prej kryetarit të asamblesë, duket si një karshillëk i kotë, sepse synon të zgjidhë një çështje të zgjidhur. Fitorja e sigurt e Ramës edhe në këtë referendum, nuk mund të pranohet nga “sifraksionistët” brenda llojit.
Çuditërisht, kjo mendësi e pahijshme dhe për opozitar, në qëllimin e vet, kishte qenë dhe e Ben Blushit më 2009. Zgjedhjet e grabitura nga PD-ja ai i konsideroi të humbura nga PS-ja dhe pa e zgjatur kërkonte dorëheqje të Ramës. Referendumet nuk mund të shpërdorohen për dukuri sherrxhinjsh. Të tillë gjithmonë do të ketë. Në mbyllje, them se Edi Rama në krye të Partisë Socialiste, u zgjodh edhe kryeministër pas votës masive të vitit 2013. Kongresi i fundit dhe statuti që miratoi, duke anuluar të vjetrin, zgjidhi përfundimisht “çështjen-statut”, një provokim djallëzor ky për ta mbajtur këtë vend të stërmunduar në amulli të përhershme. Keqdashës të huaj, s’kanë kërkuar më shumë prej rrëmujaxhinjsh politikë të këtushëm.