Reforma në shëndetësi, lejohen vetëm ilaçet me stilolapsa

Shëndetësia shqiptare po transformohet edhe në një aspekt tjetër. Ankesat dhe akuzat e shumta në drejtim të industrisë farmaceutike në vend, kanë detyruar qeverinë të ndërmarrë një reformë radikale në këtë drejtim.

Kështu, kryeministri Rama ka urdhëruar që situatën ta marrin në dorë ministria e Shëndetësisë në bashkëpunim me atë të Inovacionit dhe Teknologjisë, dhe rezultatet nuk vonuan: Drafti i ri ligjor parashikon që në listën e barnave të lejuara në treg, të hyjnë vetëm ato medikamente, stilolapsat publicitarë të të cilave janë funksionalë dhe të këndshëm në përdorim.

“Është logjike”, thanë në një konferencë të përbashkët për shtyp, ministrat Beqaj dhe Harito, “përderisa firmat e ilaçeve hedhin në treg stilolapsa kaq funksionalë, që rrëshqasin mbi letër dhe nuk ngopesh së shkruari, afërmendsh që edhe ilaçet e tyre janë super”.

 “Këto dy elemente janë komplementare me njëra-tjetrën”, deklaruan ministrat, “mendoni një stilolaps ilaçesh që nuk shkruan mirë, që nuk i punon susta, që të plas në dorë etj. Mendja menjëherë bën pyetjen: Kur këta s’bëjnë dot një stilolaps të hajrit, çfarë mund të presësh nga ilaçi?”

Në vijim, nëse suksesi i kësaj përzgjedhjeje do të konfirmohet gjerësisht, qeveria mendon që parimi në fjalë të zgjerohet edhe për mallra të tjerë promocionalë të barnave të ndryshme, si çakmakët, t-shirtet, kapelet e plazhit, mbajtëset e çelësave etj.

“Kjo ditë nuk ka pse të jetë e largët”, tha ministri Beqaj, “ja, unë provova çakmakun e Viagrës, më la pa mend. Punonte si çakmak. Ja që këtij ilaçi nuk i ka dalë nami kot”.