Reforma po bëhet për të ardhmen, jo për të shkuarën e drejtësisë

Po bëhet Reformë,
drejtësi të ketë,
dhe kjo nuk ka lidhje,
me emra konkretë.

Ka trokitur ora,
për t’u reformuar,
se sistemi është,
shumë i korruptuar.

Them aspak në mëndje,
mos i shkojë njeriut,
se Reforma bëhet,
kundër xha Saliut!

Që ligji té jetë,
njëlloj për të tërë,
Reforma do bëhet,
sepse duhet bërë!.

Ditën që Reforma,
do jetë e votuar,
askush nuk do dalë,
me pranga në duar!.

Kot e ka me frikë,
zonja opozitë,
se një ligj i tillë,
s’vlen veç për një ditë!

S’vlen veç për një ditë,
dhe as për një muaj,
nuk është kjo Reformë,
gijotina juaj!.

Nuk e dimë vërtetë,
kush ka trembur Lulin,
se qysh në Korrik,
në kryq do ta ngulin!.

Do të ngulin Lulin,
dhe shokun Sali,
po kurrë s’do ndodhi,
një e tillë çudi!.

S’i mbyll dot Reforma,
si me një magji,
njëzet e pesë vite,
me padrejtësi.

Them se do kalohet,
koha e kaluar,
dhe më s’do gjykohet,
çfarë është gjykuar.

Nëse rigjykime,
do ndodhnin vërtet’,
gjyqet s’do mbaronin,
as për njëqind vjet!.

Jo të gjitha çështjet,
në arkiv janë dyllur,
po mirë-apo keq,
të mëdhatë janë mbyllur.

Gjykoj se sistemi,
i sapo reformuar,
do shohë nga e ardhmja,
dhe jo ç’ka kaluar.

Dhe për ç’ka kaluar,
do ketë pretendime,
po nuk mund të prishen,
me mijra vendime!.

Njëzet e pesë vite,
s’mbaron epopeja,
ndaj them se do hapen,
faqe krejt të reja.

Që një vendim turpi,
mos jepet kollaj,
dhe në burg të shkojë,
kush vërtetë ka faj.

Që padrejtësia,
mos kafshojë si gjarpër,
dhe t’i mbushi burgjet,
vetëm me të varfër!.

Nesër as në mëndje,
mos e çojnë shqiptarët,
se do blejnë lirinë,
duke blerë gjyqtarët!.

Nuk them se do ndodhë,
direkt mrekullia,
në kuotën zero,
do bjerë babëzia!

Vetë sistemi i ri,
presion do prodhojë,
vështirë-një gjykatës,
të bëjë si të dojë.

Ndryshon drejtësia,
që do reformohet,
se padrejtësia,
do penalizohet!