Policia italiane ka zbardhur emrat e dy skafistëve, atij shqiptar dhe atij grek, të cilët dyshohen se kanë transportuar me gomone 21 refugjatë sirianë për në Itali.
Dy personat e arrestuar janë: Panagopoulos Nikolaos, 58 vjeç me kombësi greke dhe shqiptari Dhimitri Xauti, 35 vjeç.
Në mesin e refugjatëve u arrestua edhe një shtetas iranian, Bahram Ajhdarpoor, i cili gjatë marrjes në pyetje u pikas teksa po fshihte disa dokumente false. Rreth 21 refugjatë mbërritën pardje në brigjet e lokalitetit të Kastros në Italinë Jugore.
Dy skafistët u pikasën teksa udhëtonin me një mjet lundrues shtatë metra i gjatë, me të cilin dyshohet se kishin transportuar grupin e refugjatëve drejt brigjeve italiane. Refugjatët janë transferuar në një qendër pritjeje për identifikim ndërsa tre të sipërpërmendurit janë në burg.
