Rënia e komunizmit, Berisha e Rama bashkë: Ende jo në stadin për të pranuar kundërshtarin

Në Tiranë po zhvillohet konferenca “Shqipëria dhe Evropa, 25 vite nga rënia e komunizmit”, e organizuar nga Presidenti i Republikës, Bujar Nishani.

Në panelin kryesor është i pranishëm kryeministri Edi Rama, ish-kryeministri Sali Berisha, presidentja e Kosovës, apo ish-presidenti kroat Stipe Mesiç.

Në konferencë përshëndeti me një video-mesazh edhe kancelarja gjermane, Angela Merkel, e cila u shpreh se “Shqipëria përçon impulse për bashkëpunimin në rajon”. “Bashkëpunimi ekonomik me Shqipërinë është i frytshëm”, tha Merkel.

Në fjalën e mbajtur, kryeministri Rama theksoi se duhet ë shohim se çfarë ishte Shqipëria 25 vjet më parë dhe atë që janë Shqipëria dhe Evropa sot. Sipas tij, Shqipëria kishte sistemin komunist më barbar në Evropë, që dallonte nga të tjerët për nga brutaliteti i tij.

Rama ka vënë në dukje se, Shqipëria duhet ta ndërtojë të ardhmen e saj duke marrë si shembull historinë institucionale evropiane.  “Mësimi i parë për të nxjerrë nga këto vite, për të shkuarën dhe sfidën është se dallimin nuk e bën historia e shkuar apo e njerëzve, por tradita e institucioneve. Ne ende nuk jemi ende në atë stad ku kundërshtari të pranohet si pjesë e atij diversiteti ku kemi hyrë. Sot nuk kemi një asgjësim politik, sikurse ndodhte në diktaturë, por një riciklim të përditshëm të realitetit politik, që është reflektim i së shkuarës”, ka shtuar kryeministri.

Ndërsa ish-kryeministri Berisha e vlerësoi si historike këtë ditë, që sipas tij çoi në rrëzimin e perdes së hekurt. Berisha foli edhe për situatën aktuale në vend, duke premtuar se opozita duhet ta nxjerrë nga gremina ku ndodhet.

“Shqiptarët sot në rrugën e Europës pavarësisht se ende nuk kanë realizuar idealet e tyre, unë besoj se atëherë ata bënë një mrekulli kur dolën e rrëzuan perden e hekurt. Këto 25 vite kanë qenë më të bekuarat e historisë sonë pavarësisht nga vështirësitë e mëdha me të cilat jemi përballur, por kanë qenë vitet e lirisë së shqiptarëve, që ka qenë mungestarë e madhe”, tha Berisha.

Sipas Berishës, nëse në diktaturë, armiku ishte Hoxha dhe ideologjia, sot dy janë armiqë; korrupsioni dhe krimi i organizuar.

“Ne përballemi me dy armiq, këta dy kryesorë janë korrupsioni dhe krimi i organizuar, që marrin përmasa të frikshme, rrënojnë cdo orë, ditë, qenien e shqiptarëve, që do mund të luftohen me të njëjtin guxim si luftuam të keqen e madhe që lamë pas 25 vjet më parë. Gjendja është dëshpëruese, unë besoj se shqiptarët do tja dalin, kam besim të madh se pavarësisht nga kjo situatë shqiptarë do të arrijnë të rikthehen drejt shtetit ligjor, të luftojnë korrupsionin, krimin e organizuar dhe të zënë vendin e tyre mes kombeve të tjera në BE”, tha Berisha./Dita/