REPLIKË: Për Universitetin, Për Shoqërinë!

Aksioni në të cilin aktivistët e Lëvizjes Për Unversitetit qëlluan me vezë kryeministrin e vendit, ndërkohë që ky i fundit sapo kishte përfunduar takimin propagandistik të radhës, kësaj here në vatrën e dijes të cilën po e shkatërron përmes reformës klienteliste, pati bujë të madhe gjithandej. Ishte hera e parë që qëllohej, edhe pse simbolikisht, një funksionar shtetëror i sërës së tij. Buja ishte e madhe, e reagimet të larmishme. Nga një konstatim i thjeshtë, në auditore, në biseda të ndryshme, në rrugë, në rrjete sociale, në qendër të qytetit por edhe në fshatra periferikë, kupton se kjo protestë e studentëve është mbështetur dhe pëlqyer gjerësisht. Madje pritet prej tyre që t’i shkojnë edhe më tej përpjekjes në mbrojtje të universitetit.

Si pothuajse gjithmonë, nuk mund të shmangej as në këtë iniciativë tentativa e bandave partiake për ta keqpërdorur për interesin e tyre të momentit kuazën e drejtë të lëvizjes studentore. Partia më e madhe opozitare, Partia Demokratike, e cila ka dhënë një nga kontributet më të mëdha në degradimin e arsimit të lartë në vend, e cila disa herë gjatë qeverisjes së saj tentoi të miratonte të njëjtën reformë privatizuese dhe shkatërruese për arsimin e lartë, të cilin e jetësoi qeveria aktuale, u përpoq të përfitonte nga momenti, por u distancua fuqishëm prej Lëvizjes Për Universitetin. Me çfarë fytyre dhe morali politik mund të solidarizohen me këtë kauzë të kollarisuritut e PD-së, shumicën e të cilëve i shikon mëngjesi e darka nëpër auditoret e diplomoreve private që sponsorizuan këtë reformë shkatërrimtare për arsimin e lartë?!

Nga ana tjetër, përmes kreut të saj, qeveria e cila e ka kthyer policinë e shtetit në shërbëtore të interesave të ngushta e klienteliste, me paturpësinë më të madhe tentoi ta mohonte dhunën e ushtruar ndaj aktivistëve të shoqëruar në polici. Si në momentin e protestës, gjatë ndalimit të padrejtë dhe të paligjshëm, por edhe brenda ambienteve të komisariatit, studentët janë dhunuar sistematikisht, fizikisht dhe psikologjisht. Dhunë është futja e policisë brenda ambienteve universitare, dhunë janë goditjet, shtyrjet, sharjet, presioni, kërcënimet: dhunë që herët a vonë i kthehet kokës çdo pushteti policor e anti-popullor!

Nuk munguan as opinionet në lidhje me këtë aksion, nga qytetarë të ndryshëm, nga shoqëria civile, dhe sigurisht nga opinionistët/analistët e qeverisë. Këta të fundit nuk ka sesi të jenë objektivë, për aq kohë sa zgjedhin të bëjnë tellallin e qeverisë që ka nxitur revoltë përmes politikave të saj të padrejta, shkatërruese dhe represive ndaj masës së gjerë dhe të pambrojtur të qytetarëve. Këto “analiza” mund të jenë veç ironike, cinike, shpotitëse, subjektive; shkurt: të pavërteta të mëdha.

Në të përditshem “Dita” janë publikuar në ditët e kaluara dy opinione të cilat përpiqen të delegjitimojnë aksionin dhe përpjekjen e Lëvizjes Për Universitetin, duke dashur të legjitimojnë dhunën e qeverisë së delegjitimuar tashmë. Respektivisht, dy shkrimet janë: “RADIKALIZIMI ‘OMËLETË’ NUK NGJALL SHPRESË”, më datë 4 nëntor, dhe “STUDENTËT ‘PËRFAQËSUES’, MAKE-UP-I DHE NJË REPLIKË”, më 5 nëntor. Si aktivist i Lëvizjes Për Universitetin e shoh si detyrim për t’i bërë disa sqarime publike kundër këtyre opinioneve që do të linin për të dëshiruar edhe sikur të lexoheshin vetëm nga edramistët e thekur. Sigurisht, ky shkrim nuk ka qëllim të bindë autorët e shkrimeve të lartpërmendur, sepse ata i ka bindur interesi i tyre i ngushtë i lidhur me atë të qeverisë. Kjo është një përpjekje e thjeshtë për të qenë korrekt me studentët, pedagogët, prindërit dhe gjithë qytetarët e interesuar për fatet e universitetit dhe gjithë shoqërisë.

Në shkrimin e parë, autorin nuk e shqetëson aspak gjendja e arsimit të lartë në vend, shkatërrimi që po vazhdon t’i bëhet, por e ha meraku për imazhin, e sidomos për rehatinë personale që mund t’i prishet prej vezëve. Madje madje, sipas tij nuk duhet të merremi fare me universitetin, sepse kemi halle më të mëdha, si p.sh: reformat që do të na integrojnë në BE, etj. “Prof.Dr”-ja, autori, duket sikur këto tituj i ka marrë në ndonjë kurs të partisë në pushtet dhe jo në universitet. Asgjë nuk di për kushtet skandaloze të studentëve, në auditore e konvikte, për problematikat e panumërta që i shoqërojnë përditë.

Studentët nuk janë rehat zotëri, përkundrazi janë shumë më keq nga sa e mendoni ju prej kolltukut, prandaj edhe protestojnë. Veza sot ju duket akt barbar/kriminal (!), por nesër mund t’ju duket karamele nëse kjo qeveri e shitur tek privati vazhdon me politikat e saj të mbrapshta në kurriz të studentëve dhe të gjithë shoqërisë! E sa i përket imazhit, integrimit në BE që po u rrezikoka nga një vezë (ndërkohë që në zemër të Europës studentët i vënë zjarrin qytetit për të kërkuar të drejta e tyre!), përrallave për arritje e suksese historike ndërkohë që studentët e qytetarët përballen me më shumë vështirësi dita-ditës, këto nuk i ha më askush. Realiteti i përditshëm i universitarëve është universiteti, të cilin, pavarësisht derexhesë ku e kanë katandisur, do ta mbrojmë dhe do të bëjmë çfarëdo për ta përmirësuar. Me çdo kusht!

E sa i përket shkrimit të dytë, duke ironizuar dhe duke i bërë moral studentëve të sotëm, autori jep një argument banal se si studentët e viteve ’90 paskan dëgjuar muzikë rock dhe paskan lexuar letërsi klasike, rrjedhimisht paskan qenë “çuna bibliotekash”. Ky “argument” shpërfaq njëherazi inferioritetin kulturor të artikullshkruesit, por edhe një antagonizëm në “argumentin” e tij. E di zotëria se kush ishin shkrimtarët klasikë? Ka dëgjuar ai ndonjëherë për Majakovskin? Po Tolstojin që ai e citon, ka lexuar citatet e tij radikale ku i thur elozhe punëtorëve dhe anarkizmit? Apo për të, ta përmendësh Tolstojin në një shkrim dmth që të tregohesh i përndritur para masës. Jo, Tolstoi nuk është vetëm përmendja e tij “trendy”, por është vetë thelbi i tij dhe i tërë shkrimtarëve klasikë – është jehona e një thirrjeje për rebelim ndaj autoritetit dhe shtypjes.

Po muzia rock ç’është për zotërinë “trendy”? E di ai se si muzika rock ka lindur si shprehje e rebelimit të të rinjve kundër autoritetit politik, familjar dhe ekonomik? Për më tepër, do të na tregojë se po i njihka dhe “Pink Floyd”? Por i njeh vërtet, apo edhe këta i ka vetëm për të na shitur mend? E ka dëgjuar zotëria trendy këngën “Hey You” të Pink Floyd? I kujtohen vargjet: “hej ti, mos ju ndihmo atyre që ta varrosin shpresën; mos u dorëzu akoma pa luftuar!”? Këto vargje i kushtohen mu atij dhe sojit e sorrollopit të tij – frikacakavë që kur të tjerët sjellin shpresën, ai merr anën e pushtetit dhe me pallavrat e veta ndihmon që të shuhet ajo. Apo, ky dashamir i “Pink Floyd” a e ka dëgjuar “A Great Day for Freedom” dhe ta kuptojë se në fakt ajo që ai thotë dhe ajo që thuhet tek këngët e këtij grupi, janë diametralisht të kundërta?

Kështu që, ky “çun biblioteke” e paska keqkuptuar letërsinë klasike, muzikën rock dhe vetë konceptin e studentit. Një jetë e tërë me keqkuptime. Studenti është e kundërta e asaj që thotë zotëria. Studenti është lokomotiva e shoqërisë. Kështu ka qenë dhe kështu do të jetë në çdo vend dhe në çdo kohë. Historia lëvizet nga forca e rinisë që kërkon ndryshimin, edhe në qoftë se këtij ndryshimi i frikësohen butakët. Ndryshimin e bëjnë trimat. Frikacakët ngelin duke keqkuptuar, keqlexuar, keqdëgjuar, keqvepruar dhe keqjetuar. Jeta është e trimave. Frikacakaëve s’u ngelet tjetër veçse t’i akuzojnë trimat pse po kanë guxim të jetojnë.

E pavarësisht kritikave të pavenda, shpifjeve dashakeqe, ironisë dhe cinizmit, rruga e Lëvizjes Për Universitetin është e qartë, paçka se e vështirë. Parimet dhe kërkesat tona janë të destinuara të jetësohen, sepse janë të drejta. Mbështetja dhe solidarizimi janë gjithmonë në rritje, pikërisht sepse kemi të drejtë, jo për vete, por për gjithë shoqërinë.

Në këtë aspekt, përpjekjen tonë e vazhdojmë ditën e mërkurë, 11 nëntor, ora 11:00, nga Korpusi Universitar drejt Kryeministrisë! Kundër dhunës së shtetit policor! Për arsimin publik falas dhe cilësor!

Për Universitetin, Për Shoqërinë!

*Autori është aktivist që kundërshton ligjin për arsimin e lartë