Meta: Nuk jam zgjedhur nga ky parlament. Dekreti, detyrim të zbatohet

Presidenti Ilir Meta ka dalë sot në një deklaratë për mediat, ku iu përgjigj gazetarëve në lidhje me nisjen e procedurave nga ana e PS për shkarkimin e tij.

Ai u bëri thirrje të gjithë institucioneve të zbatojnë dekretin për anulimin e zgjedhjeve si diçka që e kërkon ligji. Sipas tij, kushdo që nuk njeh dekretin provokon stabilitetin e vendit sepse gjithçka po ndodh është e ligjshme dhe e drejtë, veç ata që ai i referohet si “të çmendur” nuk e kuptojnë diçka të tillë.

Ndër të tjera ai fton palët në tryezë për të caktuar datën e re të zgjedhjeve të lira dhe të ndershme, si hapin kryesor drejt çeljes së negociatave.

Gazetari: Zoti Meta a e lexuat rezolutën e miratuar na Parlament nga mazhoranca dhe a keni reflektuar? 100 vota ishin kundër jush zoti President….

Presidenti Meta: Presidenti është zgjedhur nga Parlamenti, natyrisht jo nga ky. Nga një parlament plotësisht legjitim, por Presidenti i takon republikës dhe republika u takon vetëm qytetarëve.

Gazetari: Por mazhoranca thotë se republika është parlamentare…

Presidentit Meta: Besoj se jam shumë i qartë.

Gazetari: A rrezikojmë të kthehemi në mbretëri tani që Kryeministri Rama i ka 94 vota?

Presidentit Meta: Shqipëria është republikë, Presidenti i takon Republikës dhe njëkohësisht republika u takon vetëm qytetarëve.

Gazetari: Datën e re të zgjedhjeve kur do ta kemi dhe kur do t’i thërrisni zotin Basha dhe zotin Rama në konsultë?

Presidentit Meta: Sa më parë të jetë e mundur, po punojmë me shumë qetësi dhe me shumë përgjegjësi. Dekreti është në fuqi, është i detyrueshëm për të gjithë. Presidenti mban shënim me shumë vëmendje çdo institucion që shkel ligjin.

Gazetari: Zoti President, ndërkohë që dekreti juaj pritet të shqyrtohet nga Kolegji Zgjedhor, a do të pranojë Presidenti i Republikës çdo vendimmarrje cilado qoftë ajo e Kolegjit?

Presidentit Meta: Dekreti mund të gjykohet edhe nga Gjykata e Skraparit që nuk ekziston. Presidenti nuk ndalon askënd të çmendet. Përkundrazi, i fton të gjithë që të izolojmë çdo të çmendur i cili në këtë dhurimi të gjakut bën thirrje për gjëra të ndryshme.

Shqipëria ka nevojë për zgjedhje të lira dhe të ndershme, sepse vetëm ato sigurojnë çeljen e shpejtë të negociatave për në Bashkimin Europian që është objektiv i të gjithë qytetarëve. Dekreti është në fuqi, dekreti është i zbatueshëm, dekreti është i detyrueshëm për të gjithë. Kush dëshiron të ecë në rrugën e paligjshmërisë, le të vazhdojë, është e drejta e tij. Presidenti ka të drejtë çdo ditë të bëjë thirrje për reflektim.

Gazetari: Çfarë pasojash do të kenë ata që ecin në rrugën e paligjshmërisë?

Presidenti Meta: Ata që ecin në rrugën e paligjshmërisë duhet të jenë të sigurt që do të kenë të gjithë pasojat që do të provokojnë paqen sociale dhe stabilitetin demokratik në vend.

e.t./dita