Rikthehet Florenc Hoxha, dhunë ndaj banorëve në Kinostudio, dy në spital

Një tjetër episod dhune ndaj qytetarëve risjell në vëmendje kreun e Inspektoratit Ndërtimor në Bashkinë e Tiranës, Florenc Hoxha, së bashku me punonjës të tjerë të institucionit që ai drejton.

Mësohet se një burrë dhe tri gra janë dhunuar nga Hoxha dhe bashkëpunëtorët e tij sot në zonën e Kinostudios.

Konflikti me banorët ka nisur për muret rrethuese të një lulishteje në zonë, por ata janë përballur me dhunën e punonjësve të Inspektoratit Ndërtimor.

Mësohet se tre personat e dhunuar janë Kujtim Hysi, Laura Hysi, Razie Hysi dhe Badije Rrokaj. Dy prej të dhunuarve, Kujtim Hysi dhe Razie Hysi janë dërguar në spital, ku po mjekohen për plagët e marra.

Ky nuk është rasti i parë i këtij lloji, për të cilin përmendet emri i Florenc Hoxhës. Një vit më parë, në media u shfaq një video që tregonte përplasjen fizike të tij me një banor të kryeqytetit në rrethana të ngjashme me ato të sotmet.

Po vitin e kaluar, Hoxha u denoncua në media për dhunën e ushtruar ndaj komunitetit rom.

Gjithashtu, publik ka qenë dhe rasti i dhunimit të dy zonjave, të cilat u dhunuan fizikisht nga Hoxha në zyrat e bashkisë, në vitin 2011, pak kohë pasi kishte marrë drejtimin e  Policisë Bashkiake. Por duket se konflikti që ka lindur me familjen e Kujtim Hysit ka lidhje me një projekt të paligjshëm që lidhet direkt me njerëz shumë influent pranë kreut të Bashkisë së Tiranës, Lulzim Bashës

Historia e një lulishteje

Shtëpia dhe disa prona të familjes Hysi në Kinostudio janë duke u prekur nga punimet e Bashkisë për ndërtimin e një lulishteje. Për këtë lulishte “të çuditshme” DITA ka shkruar tri ditë më parë. Ajo përfaqëson një lulishte që po ndërtohet pa asnjë leje, pasi për ndërtimin e saj nuk është realizuar asnjë nga procedurat ligjore në Këshillin Bashkiak. Nga ana tjetër kjo lulishte përfaqëson dhe një vepër ‘inxhinierike’ tepër paradoksale pasi është e para lulishte-bunker e ndërtuar ndonjëherë në Shqipëri.  Po po, lulishte bunker. I gjithë perimetri i lulishtes ka nisur tashmë të rrethohet me një mur të lartë. Pyetja që shtrohet është: Pse?. Këtë kanë kërkuar dhe banorët të cilët një muaj më parë kanë takuar dhe kryebashkiakun Lulzim Basha, ndërsa ky i fundit premtoi ndërprerjen e menjëhershme të punimeve. Por e kundërta ndodhi, punimet jo vetëm vazhduan por punonjësit e bashkisë dhe firma që kryen punimet shpesh ka kërcënuar dhe dhunuar qytetarët që kërkonin shpjegime. Qytetarët shprehen se ndërtimi i lulishtes në fakt është një ‘truk’ që i djeg pronat e tyre, në emër të ndërtimit të një vepre publike, ndërsa më pas veprës publike do i ndryshohet destinacioni dhe nga lulishte është në plan të kthehet në pallat apo diçka tjetër. Brenda këtij konflikti për të gjetur të drejtën e pronës së vetë ka qenë dhe Kujtim Hysi, i cili u masakrua dje në ‘dajak’ nga Florenc Hoxha me të vetët.

Shënim: Florenci si demonstrim

Përtej konfliktit të pronës dhe të ndërtimit të lulishtes, akti i djeshëm i Florenc Hoxhës dhe të vetëve përfaqëson një sfidë serioze për shtetin ligjor në Shqipëri. Shikoni si hidhet në sulm Florenci kur vjen puna për një porosi të “kryetarit”. Kryetari Basha nuk i thotë dot jo oreksit të një grupi interesi që po orienton punimet në Kinostudio. Pronarët e tokave jo vetëm që shpërfillen por në çdo rast evitohen me çdo mënyrë të mundshme. Nëse protestojnë…shkon FLorenci dhe i bën ZAP. Është e paimagjinueshme që një zyrtar shtetëror sillet si bandit me qytetarët, shteti ka rregulla, nëse ata protestojnë me pa të drejtë dhe pengojnë ekzekutimin e një vendimi shtetëror, shoqërohen në polici, izolohen. SI mundet një zyrtar policie bashkiake të dhunojë sikur është gango lagjeje qytetarët. Por nëse Florenci i ka hyrë asaj rruge me kohë, nëse Florenci ka marrë për kot, pasi ka vite që godet dhe femrat që e kundërshtojnë, një kambanë alarmi duhet të bjerë mbi  zyrtarët e policisë së shtetit, prokurorinë etj. Një bandit me uniformë shteti është shumë herë më i rrezikshëm se disa qytetarë që protestojnë. Bëni ZAP banditin njëherë, pastaj qytetarët.

Me poshte nje prej qytetareve te dhunuar sot nga Florenc Hoxha dhe policia bashkiake, i cili ndodhet ne spital: