Ish-bosi i firmës piramidale “Populli” mashtron sërish, kësaj radhe ish bashkëshorten e tij.
Bashkim Driza, i dënuar në mungesë me 16 vite burg për mashtrimin e 300 mijë personave gjatë viteve ‘95-’97, ka shitur pa dijeninë e gruas së tij shtëpinë në Tiranë. Driza, i ndihmuar edhe nga e dashura, Anila Balili nga Kosova, kanë falsifikuar dokumentet duke firmosur vetë autorizimin për shitjen e shtëpisë, shkruan sot e përditshmja “Shekulli”.
Driza dhe e dashura e tij kanë paraqitur një autorizim, sipas të cilit ish-gruaja e Drizës ka autorizuar me prokurë përfaqësimi një person tjetër, për të proceduar në emër të saj me aktin e shitjes së shtëpisë, në mungesë të saj, pasi ajo ndodhej në Republikën Domenikane.
Ka qenë ish-gruaja e Drizës, F. Ymeti, e cila ka denoncuar mashtrimin, duke provuar se gjatë kohës kur është lëshuar autorizimi për shitjen e shtëpisë, ajo ka qenë në Shqipëri dhe jo në Republikën Domenikane.
Bashkim Driza përfitoi nga shqiptarët nëpërmjet mashtrimit 870 milionë lekë të reja në kohën kur drejtonte firmën piramidale “Populli”.