Shoqëria jonë (në kompleksitetin e saj) ende s’është shkëputur nga fragmentizmat dhe mendësitë feudo diktatoriale. Si trysni e kësaj mendësie, ende e pushtetshme, Shqipëria po jeton pseudo-demokracinë, nga e cila edhe ne , të rinjtë, që kemi lindur në fillesat e demokracisë, po traumatizohemi. Pasiguria e të ardhmes po na vret. Përgjegjësia jonë fillon tek vota që do të hedhim: për subjektin apo për individin. Të meditosh është mënçuri, të votosh është patriotizëm e përgjegjësi. Vota jonë (veçanërisht e ne të rinjëve) duhet të jetë patjetër “firmë e vulë” patriotike, “rrugë evropiane” e jo subjekt “kuturuje” e aq më keq e shitur. Rinia duhet ta bëjë evolucionin jashtë militantizmit utopik e folklorik edhe përballë vështirësive e presioneve. Ndryshe, jemi thjesht viktima të kësaj që po ndodh.
Edhe “demokracinë” e ndërkombëtarëve duhet ta kuptojmë me thelbin e patriotizmit tonë inteligjent e jo në reminishencat e tyre, që, tek e fundit, mbrojnë editorialin politik dhe diplomatik të vetin apo të vendit të tyre.
Ne të rinjtë duhet të ruhemi edhe nga pseudohistoria dhe nacionalizmi ekstrem. Fjala vjen: s’mund të quhet “patriotike” politika shqiptare, që shkencërisht e historikisht, ende s’ka zgjidhur “të drejtën historike” të 28-29 Nëntorit 1944!
Marsela Xhafa, Studente e Gazetarisë