Situata në Shkodër vijon të mbetet problematike. Reshjet e dy ditëve të fundit kanë bërë që uji të jetë i pranishëm në lagjet periferike të qytetit, si dhe në fshatrat Obot e Goricë të komunës Ana e Malit,fshatrat Shirq,Mushan,Trush të Komunës Bërdicë,disa pjesë të fshatit Mali i Jushit të komunës Bushat.
Sipas prefekturës, shpërndarja e ndihmave ushqimore për familjet në nevojë vazhdon në fshatrat e lagjet në të cilat është i pranishëm uji,ndërsa banorë të këtyre zonave thonë se askush nuk ka ardhur të shohë situatën në të cilën ndodhen.
Xhevat Mollca, kryetari i komunës Ana e Malit, tha se janë 1 400 ha nën ujë dhe fshatrat Obot dhe Goricë vijojnë të mbeten të izoluar. “Në fshatin Obot janë 5 shtëpi me ujë brenda, ndërsa në Muriqan e Oblikë janë nga 12 shtëpi të rrethuara e izoluara plotësisht nga uji. Njerëzit janë të shqetësuar pasi nuk kanë shpresë se do marrin as dëmshpërblimin e 2010-s, ndërsa dëmi i shkaktuar këtë herë në bujqësi është më i madh. Ushqimi për blegtorinë përbën më shumë problem se ai për njerëzit, ndërsa deri tani nuk ka patur asnjë ndihmë”.