Ristani-Halimi, a është e mundur një trushkultësi e përmasave të tilla?

Një portal i njohur informativ botoi një ditë më parë pjesëza dialogjesh mes komisionerit Fyle e dyshes së PD-së, Ristani-Halimi. Edhe pse ka një rubrikë humoristike, portali e kish renditur tek lajmet serioze dialogun mes tyre, që, nëse vërtet ka qenë i tillë, duhet konsideruar si lemeria vetë.

Shkruante portali i Mero Bazes: Një vend të veçantë zunë në takimin me Komisionerin për Zgjerimin, Stefan Fyle, batutat e depuetëve të opozitës, Arben Ristani dhe Eduard Halimi. Ristani ka qenë dhe personi që ka shkaktuar më shumë humor me raportimin e tij. Ai në fillim falenderoi Fylen për predispozitën pozitive për statusin dhe theksoi se ishte i ngarkuar t’i raportonte për një ngjarje të rëndë që kishte ndodhur në Kuvendin e Shqipërisë.

“Një javë më parë, katër banditë me mandate deputeti, kapën në befasi një deputet të opozitës ndërsa dilte nga tualeti i Kuvendit, e shtrinë në tokë dhe filluan ta rrahin me kamxhikë…”. Fyle u hutua tërësisht dhe iu lut ta përsëriste: “Si ka ndodhur, e kanë rrahur me kamzhikë? – Po, po, i tha Ristani. Deputeti po dilte nga tualeti dhe ata iu turrën, e shtrinë përtokë dhe e përgjakën me kamxhikë…”

Fyle kërkoi përsëri t’i saktësonin përshkrimin e ngjarjes, por Ristani e përsëriti njësoj.

Pas kësaj Fyle nuk foli më. Pyeti diçka në vesh Majlindën, u sqarua dhe vazhdoi bisedën.

Pastaj e mori fjalën Halimi, i cili theksoi se ishte dakord me reformën në drejtësi, por atë duhet ta bënte Brukseli, jo qeveria. -Më vjen keq, i tha Fyle, po qeveria po nuk bëri këto punë, çfarë pune do bëjë?

Pas debatit, mësohet se Strazimiri i ka telefonuar Ristanit dhe janë dëgjuar duke u grindur. Strazimiri në fakt ka deklaruar që “nuk ka burrë të më shtrijë në tokë”, dhe deklarata e Ristanit i është dukur abuzive.

Për Fylen kjo nuk është hera e parë që ballafaqohet me një trushkultësi të përmasave të tilla. Në një takim të paradisamuajve, u detyrua t`i tërheqë vëmendjen kësaj dysheje pa shumë finesë diplomatike. Ndërsa kësaj rradhe, reagimi ishte më i qetë, pasi siç duket, edhe shkalla e njohjes së përmasës së defiçencës intelektuale, politike dhe etike karshi dyshes, i kish dhënë më pjekuri e aftësi në reagim. Çudi që lidershipi i PD-së nuk ka menduar që të paktën, në përfaqsime të këtij niveli, ku përballë janë figura me peshë të politikës dhe diplomacisë europiane, të përzgjedhë figura më të gëlltitshme, më të pranueshme, si të thuash, ca rrufjanë të sprovuar, ose që të paktën të përçojnë intelekt dhe kur heshtin. E jo të zgjedhin për në “kombëtare” dyshe si Ristani – Halimi, tipik lojtarë për kategori të tretë që më tepër zhgryhen në llucë se sa luajnë me top. Po thuaj shyqyr që këtë dysheje nuk e kanë bërë treshe, ku fjala vjen, të ish edhe… zonja Topalli! Atëherë, mjerë për Fylen!/E.H