Rrëfimi i Alida Hiskut: Si jemi përdhunuar në kaush nga prokurorët dhe sigurimsat

Si në një film tragjik rrëfehen për herë të parë ngjarjet tronditëse në jetën e këngëtares së njohur të viteve ’70, Alida Hisku. Ishte një vajzë e re, me zërin kristalor dhe që babai i saj sekretar partie i Ndërmarrjes Poligrafike, “projektonte” te ajo modelin e rinisë socialiste….

Në Shqipëri, në imagjinatën e popullit të saj, Alida Hisku ka mbetur një monument i muzikës shqiptare, edhe pse ka mbi 30 vjet e ndarë nga skena. Jeton në Gjermani, ku e njohin si gruan e jashtëzakonshme, autoren e një libri që nuk është më në treg, kurajozen, njeriun e dashur e shumë punëtor.

E pyetur në lidhje me debatin e hapur kohët e fundit për lidhjet e artistëve me Sigurimin e shtetit të asaj kohe, këngëtarja Alida Hisku thotë se “nuk mund të flas sot konkretisht, pasi ai sigurim që ka qenë atëherë është edhe sot. Atëherë ishte një sigurim që shfrytëzohej nga pushteti, sot shfrytëzohet prej lekut”.

Më pas Hisku hedh akuzën se këngëtarët që nuk ja dilnin dot vetë, lidheshin me sigurimin. “Duhet të them këtë gjë. Këngëtaret që kërkonin karrierë e që nuk ishin të gjithanëshme, ata që nuk ishin të sinqertë në krijimtarinë e tyre si artistë, iu nënshtroheshin këtyre rrugëve, duke u bërë vegla të Sigurimit të Shtetit ose politikanëve, –  thotë Alida Hisku që më pas vazhdon – unë besoja tek vetja dhe punoja fort. Arritjet e mia rrodhën natyrshëm dhe kjo mbase u vrau sytë atyre që më pas më kallëzuan se çfarë shkruaja në një ditar që e kisha shumë persona. Isha një vajzë e re që sipas kërkesave të kohës, isha këngëtare shumë popullore, isha punëtore, anëtare partie dhe të gjitha këto i kisha arritur në moshën 23 vjeçe. Mbase u vrau sytë gjithë kjo arritje, siç konsiderohej në atë kohë. Ishin tre veta ata që ma bënë këtë. Kanë qenë nga Vlora, tre artistë që ishin në Shkollën e Partisë”.

Këngëtarja nuk pranon që të thotë emrat, sepse siç thekson ajo, tani i ka falur.

Më pas Alida Hisku rrëfen edhe torturat në burgjet Tiranës, ndërsa thekson se dosjen e saj  kanë zhdukur.

“Futa avokatin tim këtu tek prokuroria e Tiranës që të gjeja dosjen time, por nuk u gjet, me janë zhdukur. I doja sepse nuk i mbaj mend të gjitha, isha në ciklin e torturave dhe gjilpërave që u bënin grave në kaushin e Tiranës”, thotë Hisku.

Më pas ajo vazhdon: Të bënin gjilpëra. Pastaj unë kalova në krizë nervore. Nuk mbaj mend çfarë lloj gjilpërash qenë, por mbaj mend shumë tortura që na bënin. Mbaj mend policët, madje edhe prokurorët që kalonin nëpër këmbët e grave. I përdhunonin”.

“Unë kam qenë vetë dëshmitare. Edhe në internim kur duhej të merrej një leje, nëse ishe e sëmurë për tu vizituar tek mjeku në qytet, nuk ta jepnin lejen po të mos të përdhunonin”, thotë këngëtarja Alida Hisku, për gazetën Shqiptarja.com.