Rritet me 60% pagesa e papunësisë

Qeveria miratoi dje vendimin për caktimin e nivelit bazë të së ardhurës nga papunësia. Niveli bazë i së ardhurës nga papunësia do të jetë 11 000 lekë në muaj. Efektet financiare, që rrjedhin nga zbatimi i këtij vendimi, të përballohen nga fondet e parashikuara në buxhetin e vitit 2016, miratuar për Ministrinë e Mirëqenies Sociale dhe Rinisë. Në vendimin e mëparshëm, niveli bazë i së ardhurës nga papunësia ishte 6850 lekë në muaj.

 Ndërkohë që ndryshon edhe koha e dhënies së kësaj pagese, duke shkuar në përpjesëtim të drejtë me kohën e dhënies së kontributeve për sigurimet shoqërore. Personave, të cilët plotësojnë kushtet, u paguhet e ardhura e papunësisë, në varësi të periudhës së kontributit të sigurimit shoqëror, përkatësisht për: a) 3 muaj, për personat me një periudhë kontributi, të paktën, një vit; b) 9 muaj, për personat me një periudhë kontributi, të paktën, 5 vjet; c) 12 muaj, për personat me një periudhë kontributi mbi 10 vjet.”

Por cilët janë kategoritë që përfitojnë të ardhura nga papunësia:

a) Të kenë kontribuar në sigurimin shoqëror për një periudhë të paktën 12-mujore, për çdo rast përfitimi;

b) Të jenë regjistruar si punëkërkues të papunë pranë zyrës përkatëse të punësimit;

c) Të kenë paraqitur kërkesën me shkrim dhe të kenë plotësuar dokumentacionin përkatës, brenda 60 ditëve nga data e lindjes të së drejtës, për t’i përfituar këto të ardhura. Përjashtim nga ky rregull bëjnë rastet kur personat e papunë janë të sëmurë dhe e vërtetojnë vonesën e kërkesës me raport mjeko-ligjor;

ç) Të jenë paraqitur në zyrën përkatëse të punësimit një herë në muaj ose sa herë, që thirren nga kjo zyrë. Në rast mosparaqitjeje, pa shkaqe objektive, humbasin të drejtën e përfitimit të këtyre të ardhurave;

d) Të pranojnë të punësohen, kur u ofrohet punë e paguar dhe e përshtatshme nga zyra përkatëse e punësimit;

dh) Të pranojnë të kualifikohen ose të rikualifikohen kur u ofrohet nga zyra përkatëse e punësimit.