1.3 miliardë dollarët e dalë nga Shqipëria vitet e fundit duhet të jenë një zile alarmi për Shqipërinë. Kështu e komenton Clark Gasciogne, zëdhënës i organizatës Global Financial Integrity raportin e publikuar disa ditë më parë nga ky institucion. Gasciogne thotë për Balkan Insight se qeveria shqiptare duhet të ndalojë lehtësimin e rrjedhjes së parave nëpër strehat fiskale.
“Qeveria duhet të kërkojë që të gjithë bankat në Shqipëri të dinë përfituesit realë, njerëzore dhe përfitues të çdo llogarie të hapur në institucionet e tyre financiare”, thotë ai duke shtuar se në shumë raste, bankat nuk e dinë kush qëndron pas kësaj apo asaj llogarie bankare. Sipas raportit të publikuar disa ditë më parë nga GFI, 1.3 miliardë dollarë, ndryshe 1/3 e buxhetit vjetor të Shqipërisë, ka dalë jashtë vendit gjatë pesë viteve të fundit.