Sa lekë do marrin nga KQZ partitë kryesore politike?

Edhe për këtë vit dy forcat kryesore politike pritet që të marrin pjesën më të madhe të fondeve të buxhetit të shtetit të destinuara për t’u përdorur nga partitë politike.

Për shkak se ka 65 deputetë në parlament, PS do të marrë 73.7 milionë lekë të rinj, ndërsa PD me 50 deputetë do të marrë 57.2 milionë lekë.

Sipas ligjit “Për partitë politike” të ndryshuar, financim nga buxheti marrin jo vetëm partitë parlamentare, por edhe partitë jashtë Parlamentit, që kanë marrë mbi 10 mijë vota në shkallë vendi. Më e fituar nga ligji i ri ka dalë partia e Bamir Topit, FRD, e cila, edhe pse është jashtë Parlamentit, do të marrë 3.5 milionë lekë të rinj, ndërsa një vit më parë, ligji i vjetër nuk i jepte më shumë se 323 mijë lekë të rinj.

Lëvizja Socialiste për Integrim me 16 deputetë në Kuvend do të marrë nga buxheti i shtetit 20.5 milionë lekë të rinj, por më pak se një vit më parë, kur përfitonte nga buxheti 22.8 milionë lekë.

Shpërndarja e buxhetit për financimin e partive bëhet sipas kësaj formule: 70% e fondit bazuar në numrin e mandateve të fituara në zgjedhjet e fundit parlamentare; 20% e fondit e shpërndarë në mënyrë të barabartë ndërmjet partive parlamentare dhe atyre jo parlamentare, që kanë marrë mbi 10 mijë vota në zgjedhjet e fundit parlamentare dhe 10% të shpërndarë për ato parti, që kanë marrë mbi 1% të votave në zgjedhjet e përgjithshme.

Shpërndarja e fondeve

Partia Socialiste 73.7 milionë lekë

Partia Demokratike 57.2 milionë lekë

Lëvizja Socialiste për Integrim 20.5 milionë lekë

Partia Republikane 6.6 milionë lekë

PBDNJ 4.1 milionë lekë

Partia Kristian Demokrate 4.1 milionë lekë

Fryma e Re Demokratike 3.5 milionë lekë

Partia Demokracia Sociale 3.1 milionë lekë

Partia Socialdemokrate 3.1 milionë lekë

Partia Demokristiane 3.1 milionë lekë

Aleanca Kuq e Zi 3.1 milionë lekë