Dërguar me email
në adresën e redaksisë
Paçi këmbën e mbarë, prapa nuk ju vjen historia! Ai që duhet t’u vijë pas, është ai kryekrimineli, me të cilin bëtë planet për “gjullurdinë e madhe”, por që nuk ju doli ashtu siç e menduat. Kështu e kanë këto punë, more “të fortët e Kuvendit”. Për sa kohë, shthurja e shtetit iu hap derë e dritare ordinerëve, për t’u pasuruar brenda muajsh me mënyra ilegale kriminale, për sa kohë me ato mjete financiare mund të korruptohet çdokush në vendimmarrjen e partive politike dhe këto elemente fitojnë statusin e deputetit me imunitet, për aq kohë fshatarët e veshur me veshje firmato, do të mendojnë se bota është e tyre.
Uria vjen duke ngrënë. Kështu mendoi edhe Tom Doshi dhe për një moment u hodh në aksione të “mirëplanifikuara”, për një të ardhme sipas gustos së zotërisë. Për këtë, ishte i gatshëm të flinte edhe me qen. Nga ai “gjumë me qenër” u zgjua me pleshta. Është pjesë e lojës e gjitha kjo.
Atë ditë, që politikanët e këtij vendi do të vendosin vërtetë të bëjnë shtet, atë ditë do humbasë edhe iluzioni i fundit i çdo krimineli ordiner, do humbë përgjithmonë ëndrra për të qenë “i fortë” apo mbi shtetin. Rruga e mbarë Tomë, Saliu të ardhtë mbrapa!