Schröder: Ramës i duhet më shumë se një mandat

Shqipëria është vend kyç në rajon, kështu ishte para shumë vitesh dhe kështu është edhe sot në kursin e qeverisë federale gjermane; reformat e vështira sjellin fryte vetëm pas tre apo pesë vitesh dhe sfidat me të cilat përballet vetë Europa sot, mund të përballohen vetëm duke qëndruar të bashkuar.

Këto ishin mesazhet kryesore që përcolli Gerhard Schröder në Tiranë, ish-kancelari gjerman, i cili njihet për rolin e tij nxitës të integrimit europian. Të hënën ai mbajti në COD një prezantim “Mbi sfidat ekonomike, të emigracionit dhe të integrimit brenda projektit europian”.

Pas ketij takimi, kryeministri Rama ka publikuar disa fotografi, duke theksuar se edhe Shreder mendon se atij i duhet edhe nje mandat tjeter qe reformat te preken nga shqiptaret.

“Mbrëmë në COD me Gerhard Schröder, Kancelarin gjerman të viteve 1998-2005, reformatorin e madh të Gjermanisë e të vetë Partisë Socialdemokrate Gjermane, që erdhi në Shqipëri për t’u njohur nga afër me reformat tona dhe folur për sfidat e modernizimit në kontekstin e sotëm europian e rajonal.

I mbresuar shumë pozitivisht nga rruga e Shqipërisë tre vitet e fundit, Kancelari Schröder uroi që të vazhdojmë në këtë rrugë reformash, duke theksuar se rezultatet e kësaj rruge kërkojnë më shume se një mandat për t’u prekur nga të gjithë”, shkruan Rama ne Facebook.