Sebastian Vettel fitoi garën e katërt radhazi e të nëntën në këtë sezon në Çmimin e Madh të Japonisë.
Piloti gjerman kishte shanse për të fituar matematikisht titullin e katërt kampion në karrierë, por diçka e tillë do të shtyhet pas dy javësh në Indi, pasi Alonso arriti të mbyllte garën në vendin e katërt.
Dominimi i Red Bullit u vërtetua edhe nga piloti i dytë i saj, Mark Webber, që arriti të pozicionohej i dyti. Romain Grosjean i Lotus arriti të kryesonte garën gjatë pjesës më të madhe të saj, por i parakaluar në dhjetë xhirot e fundit, francezit iu desh të kënaqej me vendin e tretë në podium. Pas Alonsos në vendin e katërt arriti të pozicionohej Raikkonen, që në sezonin e ardhshëm do të jetë shoku i tij i skuadrës tek Ferrari.
Nga ana e tij, Hamilton nuk mundi ta mbyllte këtë garë, pasi që në start pati probleme me makinën e tij dhe u detyrua të tërhiqej pas vetëm nëntë xhirosh.