Sekretari i Përgjithshëm i OSBE-së, Thomas Greminger nis këtë të martë një vizitë zyrtare në Tiranë, ku do të takohet me zyrtarë të shtetit.
Sipas OSBE-së, Greminger do të takohet me Presidentin Ilir Meta, Kryetarin e Kuvendit Gramoz Ruçi, Ministrin për Evropën dhe Punët e Jashtme Ditmir Bushati dhe Ministrin e Brendshëm Fatmir Xhafaj. Ai gjithashtu do të takohet edhe me Kryetarin e Partisë Demokratike Lulzim Basha.
Gjatë vizitës së tij zyrtare në Tiranë, Sekretari i Përgjithshëm do të nënshkruajë marrëveshjen e bashkëpunimit mes Kuvendit të Shqipërisë, OSBE-së dhe Qeverisë Zvicerane në lidhje me projektin e ri, ‘Mbështetje për Kuvendin e Shqipërisë dhe Edukimin Qytetar’.
Projekti ka për synim ndërgjegjësimin dhe fuqizimin e qytetarëve, me qëllim që të marrin pjesë në proceset vendimmarrëse në vend.
s.a/dita