Seks për 3 mijë lekë: “Nuk kemi mundësi të tjera ekonomike”

Ushtronin prostitucion në rrugët e kryeqytetit, arrestohen katër të dyshuar, mes të cilëve edhe 3 femra. Operacioni është koduar “Londër” dhe u krye ditën e djeshme nga Sektori Kundër Trafiqeve të Paligjshme në Policinë e Tiranës. Akuzat e ngritura janë “shfrytëzim për prostitucion” dhe “mbajtje e lokaleve për prostitucion”, ndërsa një prej femrave u la për hetim në gjendje të lirë, ndërsa ka qenë më parë e dënuar për këtë akuzë.

Burime të policisë thanë për gazetën se operacioni është koduar “Londër” duke marrë shkas nga vendi ku rekrutoheshin dhe ushtrohej fshehurazi ky aktivitet i paligjshëm. Gratë hiqeshin si kliente dhe aty binin në kontakt me burrat duke bërë Pazar me çmim që varionte sipas moshës dhe mundësive ekonomike. Mesatarisht për çdo akt seksual mësohet se paguheshin 2-3 mijë lekë të reja, ndërsa ambientet ishin kthyer edhe në hotel për ushtrim prostitucioni.

Të arrestuarit e aksionit policor janë Vera Hodo, 54 vjeçe, banuese në Kamëz, Daniela Abedini, 35 vjeçe, banuese në Laprakë dhe Dritan Tafa, 36 vjeç, banues në Tapizë. Kurse në gjendje të lirë pas shoqërimit u la Floresha J., 42 vjeçe, e dënuar më parë për prostitucion. Policia tha se aktiviteti ushtrohej në periferi të kryeqytetit, në një ambient që shërbente edhe si lokal, në pronësi të një prej të arrestuarve, 36-vjeçarit Tafa.

Në ngarkim të tyre, Prokuroria e Rrethit Tiranë, ka regjistruar procedimin penal për veprën penale të “shfrytëzimit për prostitucion” dhe “mbajtje e lokaleve për prostitucion”. Ndërsa gjatë marrjes në pyetje gratë e dyshuara janë shprehur se nuk kanë pasur të tjera mundësi ekonomike dhe punësimi për të mbijetuar. Policia ka infiltruar një agjent për të zbuluar aktivitetin e paligjshëm, i cili është hequr si klient, duke dokumentuar akuzat e ngritura me fotografime, filmime dhe prova të tjera që janë futur në dosjen hetimore.

Po dje në kryeqytet, gjatë një aksioni të agjentëve të Antidrogës, u arrestuan Ilirjan Kapo, 23 vjeç dhe Gazment Gazheli, 42 vjeç, banues në Tiranë, i dënuar më parë veprën penale “armëmbajtje pa leje”, pasi te rruga “Kongresi i Manastirit”, janë kapur në flagrancë me disa doza të llojit heroinë, që u sekuestrua si provë materiale.

Të arrestuarit:

Vera Hodo, 54 vjeçe, Kamëz

Daniela Abedini, 35 vjeçe, Laprakë

Dritan Tafa, 36 vjeç, Tapizë

Floresha J., 42 vjeçe, gjendje të lirë