KE vlerëson progresin e bërë nga Shqipëria me zgjedhjet parlamentare të 23 qershorit, ndërkohë që këtë moment e sheh si një hap më afër të Shqipërisë me familjen evropiane. Ambasadori i BE-së në Tiranë, Etore Sequi e shikon si të mundshëm brenda vitit marrjen e statusit të vendit kandidat, por ai apelon për bashkëpunim mes mazhorancës së re dhe opozitës së djathtë.
Diplomati Sequi e konsideron të rëndësishme gjithëpërfshirjen dhe frymën e kompromisit, sipas tij për të ecur përpara drejt Bashkimit Europian.
Turi i takimeve që ka ndërmarrë këto ditë i dërguari i Brukselit në Tiranë me kryeministrin në detyrë, atë të ardhshëm, kreun e LSI-së dhe me presidentin e vendit, në thelb ka pasur tri diskutime kryesore. Pjesëmarrjen e madhe në zgjedhje dhe besimin e publikut në to, tranzicionin e butë të pushtetit dhe sfidat e së ardhmes.
Ambasadori Etore Sequi deklaroi dje për “Vizion Plus”, se në të gjitha bisedat ka përmendur tri fjalë kyçe, që janë përdorur edhe nga faktori politik shqiptar pas zgjedhjeve: “Gjithëpërfshirja dhe fryma e kompromisit janë shumë të rëndësishme për të ecur përpara drejt Bashkimit Europian. Axhenda e integrimit ishte dhe është në krye të axhendës së të gjitha partive e veçanërisht të koalicionit fitues. Por përpara ka sfida të afërta dhe të rëndësishme. Në raportin e progresit në tetor do të përmenden zgjedhjet dhe miratimi i tri ligjeve, por ka disa aspekte që duhet të jenë në fokus të aktivitetit të qeverisë së re: Lufta ndaj krimit të organizuar dhe korrupsionit. Me të gjithë bashkëbiseduesit kemi parë angazhim në këtë aspekt.”
I pyetur se sa i mundur është statusi i kandidatit për Shqipërinë brenda vitit, diplomati Sequi thotë se është i mundur por jo i sigurt, pasi duhet të punohet në disa drejtime. “Shanset janë reale dhe statusi i vendit kandidat është i arritshëm në dhjetor. Por kjo nuk do të thotë që kjo është një gjë e sigurt. Duhen trajtuar pa humbur kohë disa sfida: Lufta ndaj krimit e korrupsionit, funksionimi i shtetit të së drejtës dhe reformat që lidhen me sistemin gjyqësor. Tek të gjithë ka dëshirë e vullnet për të ecur përpara. Shembulli i Kroacisë është frymëzues”, – u shpreh ambasadori i BE-së në Tiranë.
Ambasadori Etore Sequi tregon se po ndjek me vëmendje edhe garën për kreun e PD-së dhe shkëmbimet e ideve e debatin politik, dhe i duket interesante. “Besoj fort, – thotë Sequi, – në rolin e opozitës në shoqëri, dhe në fakt ne të gjithë duam të shohim një qeveri të fortë funksionale dhe demokratike, dhe një opozitë të tillë. Ndërkombëtarët, në mënyrë të veçantë ambasadorët e akredituar në vendin tonë kanë intensifikuar së fundi takimet me krerët e mazhorancës së re dhe kreun e shtetit, në një moment kur mazhoranca e re pritet të marrë pushtetin në muajin shtator.