Forcat speciale të xhandarmërisë serbe kanë hequr sot në mëngjes lapidarin e heronjve të UÇPMB-së, në Preshevë. Portali Presheva.com informon se mijëra forca speciale të xhandarmerisë, sot në ora 07:00 të mëngjesit, kanë larguar përmendoren e vendosur në qendër të Preshevës. Nga ish-tregu i vjetër e deri tek rruga që shpie deri tek qendra, në rrugën “Ramiz Sadiku” nga rruga e fshatit Rahovicë deri tek qendra dhe ajo që shpie rrugës për Gjilan kanë qenë të bllokuara nga mijëra forca speciale. Xhandarmëria e largoi dhe mori me vete edhe përmendoren duke e dërguar në lokacion të panjohur dhe pastaj u largua nga qendra e Preshevës.
Gjatë aksionit nuk ka pasur ndonjë incident. Mediat lokale e kanë përcjellë nga afër aksionin e xhandarmërisë serbe, derisa nuk ka pasur ndonjë veprim rezistence nga banorët lokalë.
Një ditë më barë liderët politikë të Luginës së Preshevës janë pajtuar në parim për heqjen e lapidarit, si rezultat i presionit të mekanizmave ndërkombëtarë, por pa përcaktuar vendin se ku do të zhvendoset. Ata janë takuar dje me shefin e OSBE-së në Bujanoc, Eric Manoton.
Siç dihet kryeministri serb Ivica Daçiç kishte dhënë ultimatum që lapidari të zhvendoset para datës 17 janar, kurse kishte ngjallur reagime të shumta tek gjithë spektri shqiptar.