Ka ditë që mediet serbe kanë ringritur ose po përpiqen të ringrisin edhe një “Dick Marty” në Kosovë.
Kështu, medie të Beogradit, vizuale, audio, online e të shkruara, në kor dhe me akuza të njëjta po shkruajnë, se si, gjoja, zëvendëskryeministri e ministri i Jashtëm i Kosovës Hashim Thaçi paska bashkëpunuar me zyrtarë e punëtorë shëndetësorë nga Nigeria për trafikim organesh të serbëve të rrëmbyer në Kosovë gjatë dhe pas luftës.
Këto medie, për gjoja implikimin e Thaçit në këtë trafikim përmenden edhe politikanin e miliarderin Rochass Okorocha , të cilin trafikim, gjoja e ka zbuluar doktori nigerian Philip Ngamandzemin, transmeton Koha.net.
Sot, portali serb B92, ka njoftuar se Prokuroria serbe për krime lufte i ka dërguar Nigerisë kërkesë që të zhvillojë një bisedë me doktorin Philip Ngamandzemi lidhur me ato për të cilat ai e akuzon Thaçin dhe bashkëkombëtarin e vet Okorocha.
Për këtë “trafikim” ka folur edhe lideri i “Listës Serbe”, Slavko Simiq.
Ai ka thënë se akuzat e mjekut nigerian kundër Hashim Thaçit nuk janë të reja në Kosovë.
“Ajo që Asociacioni i mjekëve nigerianë ka nxjerrë opinion nuk është e panjohur. Për fat të keq, rrethanat që na janë imponuar nuk na kanë ofruar shumë mundësi që të zgjedhim, ne po flasim e po bashkëpunojmë me përfaqësuesit shqiptarë të zgjedhur në mënyrë legjitime”, ka thënë ai.
Në muajin mars të vitit 2012, guvernatori i shtetit Imo të Republikës Federale të Nigerisë, Owelle Anayo Rochas Okorocha kishte zhvilluar një vizitë zyrtare në Kosovë ku ishte pritur në Qeverinë e Kosovës nga zëvendëskryeministri i parë i Qeverisë së atëhershme, Behgjet Pacolli, zëvendëskryeministrja e atëhershme Mimoza Kusari Lila dhe zëvendësministri i Punëve të Jashtme i atëhershëm, Ibrahim Gashi.
Atëbotë ishte thënë se Nigeria kishte njohur pavarësinë e Kosovës. Nota verbale e Nigerisë për njohjen e Kosovës ende nuk ka arritur në Prishtinë.