Sharjet e komentuesve, Berisha ndryshon fjalimin për Ramën në Serbi

Në një kohë që e gjithë klasa politike do të duhet të ishte e bashkuar, ish-Kryeministri Sali Berisha ka kritikuar qëndrimin e Kryeministrit Edi Rama në Beograd, i cili deklaroi se Kosova është një realitet pashmangshëm dhe i njohur nga më shumë se gjysma e vendeve anëtare të OKB-së.

Berisha është ndier i revoltuar nga kjo deklaratë, duke postuar një reagim tepër të fortë në Facebook. Për Berishën, konferenca e përbashkët midis Kryeministrit shqiptar dhe atij serb degradoi për shkak të Ramës. “Konferenca e shtypit Vuçiç-Rama degradoi sikur të ishte konferencë shtypi midis Dukës dhe kreut të Federatës Serbe të Futbollit”, shkruan Berisha në Facebook. Ndërsa Lulzim Basha, ka preferuar që të mos komentojë vizitën e Ramës, duke zgjedhur heshtjen.

Reagimi qytetar

Por, kjo deklaratë ka bërë që fansat e tij në Facebook të shpërthejnë më fyerje kundër Berishës. Ajo që bie në sy është se përveç shqiptarëve të Shqipërisë, reagime tepër të ashpra Berisha ka marrë edhe nga shqiptarët e trevave shqiptare dhe të diasporës. Një prej qytetarëve, Mendurim A. Presheva, shkruan: “Pse ti nuk ishe në vizitë? Sa kohë të priti Presheva për vizitë? S’ke të drejtë as të komentosh për këtë gjë”. Një tjetër komentues, Besmir H. Dalladaku, shkruan: “Ke degraduar ti o Sali Berisha, thirri mendjes… Ramës bravo i qoftë, i zbardhi faqen Shqipërisë dhe neve në Kosovë me ato deklarata që dha. Ik o Sali, mos fol se u bëre turpi i botës. Ruaje atë pak autoritet dhe atë pak fytyrë që të ka mbetur. Me sa po shoh ju nuk i shikoni gjërat ashtu siç janë, por vetëm ashtu siç dëshironi ju t’i shtrembëroni, njëlloj si Enveri dikur i bënte gjërat, jo siç ishin, por siç donte vetë”. Një komentues tjetër, Juli Azizaj, ka shkuar: “Shko mor i rrjedhur… Nuk pate kurrë guximin të bëje atë që bëri Rama sot në Beograd. Sot Kryeministri ynë ka folur në emër të majtëve dhe të djathtëve”. Kurse një komentues e cilëson si serb dhe të lidhur me interesat serbe ish-Kryeministrin Berisha. “Vizita e Ramës në Serbi, Saliut i ka prishur shumë punë, sepse Saliu rrezikon pensionin që shteti serb i ka premtuar këtij dhe Hashim Thaçit. Përse nuk u bë asnjë vizitë nga Saliu për 24 vjet me radhë në Beograd? Sepse Saliu është vegla e tyre dhe prodhim i tyre, prandaj supermbesa shpërtheu kundra shqiptarëve, sepse në venat e saj ka gjak Serbie…Rrofshin demokratët e vërtetë, jo demokratët si Saliu e Thaçi…”.

Turma detyron Berishën të ndryshojë mendim

Irritimi i pothuajse të gjithë ndjekësve, ka detyruar ish-Kryeministri Berisha që të zbusë tonet si dhe të replikojë disa herë me ndjekësit e tij gjatë gjithë ditës. Ashtu si “supermbesa” e tij, Berisha ka vijuar sërish me kritikat ndaj Ramës, ndonëse rreth mbrëmjes është detyruar që të zbusë tonet dhe të ndryshojë paksa qëndrim dhe ta shohë me një këndvështrim më pozitiv vizitën. Madje, ish-kryetari i PD-së do të inskenonte edhe një prononcim me mediat. “I gjithë ky shpërthim histerik i Vuçiç erdhi si rezultat i përmendjes nga Rama të Kosovës se të pavarur, gjë të cilën e kanë bërë shumë herë në Beograd udhëheqës kryesorë europianë dhe SHBA. Vuçiç është përgjegjës për ofendimin e mysafirit para mbarë shqiptarëve me mosvënien e flamurit tonë kombëtar në aeroport, në një vizitë që edhe pala serbe e kishte vlerësuar historike. Vuçiç, jashtë çdo etike në traditën serbe, për t’u bërë viktimë edhe kur janë agresorë, e quajti jo pa qëllim Ramën, jo një apo dy, por pesë herë provokator, duke shkelur kështu çdo etikë elementare”, sqaron Berisha.

Sipas ish-kryeministrit Berisha, shefi i qeverisë shqiptare Edi Rama bëri vetëm një gabim. “Rama bëri vetëm një gabim, që në ligjëratën e tij tejet të gjatë 50 minutash iu mbajt formulimit për Kosovën që kishin rënë dakord me vetë zyrën e Vuçiç dhe nuk kërkoi troç që Serbia të njohë Kosovën, por i bëri thirrje vendeve anëtare të BE-së nga vendi i gabuar që të njohin Kosovën dhe deklaroi se në këtë kontekst çdo perceptim i ri i Serbisë për Kosovën do të vlerësohej shumë”, vijon më tej komentin e tij Berisha.

Berisha deklaron se Vuçiç me largimin e tij pa shtrëngim duarsh nuk ka fyer vetëm mysafirin, por edhe veten dhe mikpritjen e zyrës dhe vendit të tij. “Por Rama bëri gafën e madhe që kishte porositur Sokol Ballën dhe ndonjë tjetër që të ngrinin në konferencë shtypi nëpërmjet pyetjeve Olsi Ramën, dronin, ndeshjen, të cilën vet Rama e shiti për këtë vizitë, duke degraduar kështu konferencën e shtypit sikur të ishte konferencë e kryetarëve të federatave të futbollit dhe jo dy kryetarëve të ekzekutivit që po takoheshin, jo për të shkuarën!”, thotë Berisha i cili shton se: “Pyetjes nëse i përmirësoi apo përkeqësoi kjo vizitë marrëdhëniet midis dy vendeve dhe kombeve tona (të cilën e majta po e lartëson për nostalgjinë për Enverin), gjykuar nga konferenca e shtypit ka ndodhur e para, por natyrisht vizita nuk ka pasur vetëm konferencën, por dhe bisedimet dhe marrëveshjet. Ndaj mbetet për t’u parë. Por një gjë është e sigurt, se këta nuk janë shtetarë por…”, përfundoi Berisha në reagimin e tij ndaj vizitës së Ramës në Beograd.