Shtetet e Bashkuara të Amerikës dhe vendet europiane i bëjnë thirrje presidentit sirian Bashar al Asad të mos tentojë të përdorë armët kimike kundër rebelëve. Një kërkesë e tillë vjen pas lajmit se forcat qeveritare siriane i kanë spostuar këtë lloj armatimesh gjatë ditëve të fundit.
Lajmin e jep e përditshmja amerikane “New York Times”. Sipas disa burimeve izraelite, në Siri po vihet re përgatitja e këtyre armëve për përdorim, por nuk përjashtohet edhe mundësia e një blofi nga ana e forcave të Asadit.
“Monitorimet që kemi bërë gjatë ditëve të fundit na bëjnë të dyshojmë për një përdorim të mundshëm të këtyre armëve”, ka thënë një funksionar i lartë amerikan.
Frika e përdorimit të armëve kimike mbi rebelët dhe popullsinë civile në Siri është theksuar edhe nga ish-bashkëpunëtorë të presidentit Asad, të cilët kanë dezertuar.