SHBA dhe Kuba më afër se kurrë

Afrimi mes Kubës dhe SHBA, ka filluar të materializohet në samitin e Panamasë. Të enjten në mbrëmje u bë një foto historike: Takimi midis Sekretarit amerikan të Shtetit, John Kerry, dhe homologut të tij kuban, Bruno Rodriguez. Ky është takimi më i rëndësishëm diplomatik mes këtyre vendeve në më shumë se një gjysmë shekulli.

Departamenti amerikan i Shtetit publikoi në Twitter një foto të Kerryt dhe Rodriguezit, në të cilën ata shfaqen duke shtrënguar duart. Pas mesnate, një zyrtar i lartë amerikan tha në kushtet e anonimitetit se takimi ishte “i gjatë” dhe e cilësoi atë “shumë konstruktiv”.

Sekretari i Shtetit dhe Ministri kuban i Punëve të Jashtme ranë dakord se është bërë “progres” dhe shprehën se do të vazhdojnë të punojnë për të zgjidhur “çështjet e pazgjidhura”, sipas zyrtarit të lartë në një deklaratë të shkurtër të lëshuar nga Departamenti i Shtetit.

Takimi mes Kerryt dhe Rodriguezit ishte takimi dypalësh i nivelit më të lartë në dekada, në kuadër të shpalljes historike për restaurimin e marrëdhënieve, të kryer në dhjetor nga presidentët e SHBA-së, Barack Obama, dhe Kubës, Raul Castro.

Obama dhe Castro patën atëherë një bisedë telefonike para shpalljes së afrimit dhe të dy janë tashmë në Panama për të marrë pjesë në Samitin e Shtatë të Amerikave, i cili filloi dje. Shtëpia e Bardhë tha dje se nuk parashikohej një takim bilateral mes Obamës dhe Castros, por që të dy udhëheqësit do të kenë një lloj “ndërveprimi”.

Megjithatë me mbërritjen në shtetin e Panamasë, Barack Obama dhe Raul Castro kanë zhvilluar një bisedë telefonike. Nga Xhamajka, Obama ka thënë se ka marrë nga Kerry rekomandim nëse Kuba duhet të dalë nga lista e vendeve që sponsorizojnë terrorizmin, por tha se ai nuk ka marrë ende një vendim. Senatori Ben Cardin, demokrati i rangut më të lartë të Komiteti të Çështjeve të Jashtme të Senatit të SHBA zbuloi pak më pas siç parashikohej se rekomandimi që Kerry i dërgoi Obamas është në favor të heqjes së Kubës nga lista. Rekomandimi i Kerry-it duhet tani të shqyrtohet nga një ekip i Shtëpisë së Bardhë, që do t’i çojë më pas Obamës konkluzionet e tij.

Kuba pretendon largimin e saj nga kjo listë, në të cilën shfaqet çdo vit që nga viti 1982, por nuk e konsideron një “parakusht” për të rifilluar marrëdhëniet dypalëshe me SHBA-në dhe rihapjen e ambasadave në kryeqytetet përkatëse, por ekspertët bien dakord se do të ishte një hap shumë i rëndësishëm drejt normalizimin diplomatik.
Për të hequr Kubën nga lista, SHBA duhet të arrijë në përfundimin se “gjatë gjashtë muajve të fundit vendi nuk është përfshirë në mbështetjen, dhënien e ndihmës, ose ka bashkëpunuar për kryerjen e akteve terroriste ndërkombëtare”, siç shpjegoi së fundmi Kerry.

Sapo Obama të njoftojë vendimin, duhet ta njoftojë zyrtarisht në Kongres, i cili ka 45 ditë kohë për të studiuar dhe, në rast mosmarrëveshjeje, mund të paraqesë një projekt-ligj për të përmbysur vendimin e presidentit. Në një intervistë para se të udhëtonte për në Xhamajka dhe Panama, Obama theksoi se “ndryshimet historike” në politikën ndaj Kubës tashmë po japin “rezultate”.
“Kemi parë një rritje të kontaktit mes popullit të Kubës dhe SHBA-së, dhe entuziazmi i popullit kuban ndaj këtyre ndryshimeve, tregon se jemi në rrugën e duhur”, tha ai./DITA