Shtetet e Bashkuara të Amerikës në mënyrë të përsëritur po theksojnë se Shqipëria ndodhet në një moment kritik. Pas deklaratës së Hillari Klinton dy ditë më parë ishte ndihmësi i saj, Filip Gordon, i cili theksoi gjithashtu se vendi është në moment kritik dhe duhet të bëj zgjedhje të lira e të ndershme. Për të përforcuar këtë qëndrim ditën e djeshme ishte ambasadori Arvizu i cili po ashtu vuri theksin te momenti kritik i Shqipërisë. Sipas diplomatit amerikanë në Tiranë, Shqipëria ka më shumë probleme sesa vetëm ligjet me 3/5. Një ditë përpara seancës së fundit parlamentare për miratimin e tre drafteve të vëna kusht nga Bashkimi Europian për statusin, Alexander Arvizu i përgjigjet interesimit të medias për ngërçin mes palëve. Duke cituar Sekretaren amerikane të Shtetit Hillari Klinton në Tiranë dhe zëvendësndihmësin Filip Gordon, Arvizu e konsideroi Shqipërinë në udhëkryq kritik, që testin e ka tek zgjedhjet e 2013. “SHBA besojnë se Shqipëria është në një udhëkryq kritik. Sekretarja Klinton e ka bërë të qartë që zgjedhjet e 2013 do të jenë një test kritik për Shqipërinë. Ajo dhe të gjithë zyrtarë amerikanë nxisin reformat. Axhenda e këtyre reformave përfshin shumë pika, por dy janë më të rëndësishme. E para janë 3 projektligjet që ju përmendët, por elementi i dytë që është edhe më i rëndësishëm është në fakt rezultati në luftën kundër korrupsionit dhe një qeverisje më e mirë. Këto të dyja shkojnë krahë për krahë dhe nuk mund të ndahen”, tha Arvizu. Diplomati amerikan tha se është kontakt të vazhdueshëm më faktorin politik në Tiranë për të nxituar dialogun. Ai nënvizoi një nga mangësitë e mëdha në Shqipëri është komunikimi i dobët mes liderëve politikë. Duke shmangur komentin mbi ftesën e kreut të opozitës për një tryezë partish, Arvizu vuri theksin tek rritja e komunikimit mes tyre.