Drejtori i Agjencisë Qendrore të Inteligjencës e ngriti çështjen e presidentit sirian Bashar al Assad dhe mundësinë e largimit të tij nga pushteti kur vizitoi Moskën në fillim të marsit.
Lajmin e bën të ditur agjencia e lajmeve “RIA”, që citon burime pranë Ambasadës së Shteteve të Bashkuara në Rusi. Drejtori John Brennan, sipas të njëjtës agjenci, diskutoi edhe lidhur mbi ecurinë e armëpushimit në Siri.
Ndërkohë, agjencia tjetër ruse e lajmeve, “Interfax” citoi zv.ministrin e Jashtëm rus, Oleg Syromolotov të thoshte se, Brennan ishte takuar edhe me shefin e FSB-së, ndërsa mohoi që vizita e tij të ketë qenë e lidhur me vendimin e Moskës për të tërhequr trupat nga Siria.
Dean Boyd, zëdhënës i CIA-s, konfirmoi ndërkohë për agjencinë “Reuters” vizitën e shefit të tij në Moskë në fillim të muajit dhe se çështjet siriane ishin pjesë e axhendës së bisedimeve.
“Synimi i vizitës së Brennan ishte të theksonte me palën ruse rëndësinë që Moska dhe regjimi i Assad të ndjekin marrëveshjet e arritura me qëllim dhënien fund të akteve luftarake në Siri”, njoftoi CIA përmes një deklarate për shtyp.