Kryegardiani grek pranon torturat ndaj Karelit

Fakte të reja kanë dalë nga hetimet për torturimin deri në vdekje të Ilia Karelit, (Kudret Kume) në Burgun e Nigritas në Greqi. Prokuroria e Selanikut ka marrë dëshminë e disa të dyshuarve, mes tyre edhe shefit të gardianëve, që ka pranuar se ka ushtruar dhunë fizike ndaj 42-vjeçarit shqiptar, në shenjë hakmarrje për vrasjen e kolegut të tyre të pafajshëm. Jo vetëm kaq, por siç raportojnë mediat greke, oficeri i lartë i ka dërguar një mesazh lamtumire bashkëshortes dhe ka tentuar të vetëvritet. Por gjithashtu mësohet se nuk ka ende zyrtarisht të arrestuar për ngjarjen, pasi 4 të ndaluarit janë liruar përsëri. Për incidentin akuzohen 14 gardianë të Nigritas. Konsullata Shqiptare në Selanik po ndjek nga afër rastin në fjalë dhe procedurat hetimore. Ndërkohë që dje procedurat i kaluan Gjykatës së Serresit. Gjithashtu mësohet se e gjithë ngjarja është zhvilluar në Burgun e Nigritës në dy ditë radhazi, në Serres. “Asnjë vepër penale e dënueshme nuk ka ndodhur në Burgun e Malandrinos”, thanë hetuesit grekë për mediat, duke sqaruar një detaj hetimor.

Nga dëshmitë e para të mbledhura nga gardianët, Kareli është rrahur jashtë survejimit të kamerave në një qeli të izoluar, duke u goditur me kamzhik, grushte e shkelma. Mjekja ligjore Eleni Zaggelidis  ka mohuar në një edicion lajmesh publikimet e shtypit shqiptar, se Karelit i janë hequr thonjtë apo nxjerrë syri, teksa priten rezultatet për djegien në duar.

Dëshima kryesore është ajo e kreut të rojave të burgut të Nigritës, Haris Konsilidhis, i cili pas disa orësh hetimesh nuk ka duruar dhe pohoi torturat e kryera ndaj të burgosurit shqiptar. Më pas i ka telefonuar gruas së tij dhe i ka kërkuar të falur, duke tentuar të vrasë veten. Kështu raporton shtypi grek, por nuk dihet nëse tentativa është e vërtetë. Sipas dëshmive të tij, nëntë roje burgu kanë torturuar Karelin, por në hetuesi vetëm dy prej tyre kanë pohuar dhunën dhe 7 e mohuan përfshirjen.

Prokuroria ka në dosje edhe videon ku shfaqet Kareli që tërhiqet zvarrë në burg pasi del nga një dhomë pa kamera survejimi dhe në qelinë e tij më pas ka shqetësime shëndetësore, që e çuan në vdekje.

Digjet flamuri grek

Një grup të rinjsh që u identifikuan si pjesëtarë të lëvizjes “Reago për Drejtësi”, u tubuan pasditen e djeshme para Ambasadës së Greqisë në Tiranë dhe pasi bënë thirrje për dënimin e krimit çnjerëzor ku gardianët helenë torturuan për vdekje Ilia Karelin në burgun e Nigritas, i vunë dhe flakën flamurit grek. Flamuri ka pasur gjithashtu një shenjë të nazizmit, kryqin e thyer, ndërsa i është vënë zjarri në mënyrë demonstrative. “Jemi këtu për ti bërë apel pikësëpari qeverisë shqiptare që duhet të mbajë një reagim të ashpër ndaj qeverisë greke. Është e patolerueshme që në shekullin 21-të të dënuarit shqiptarë për krime që as nuk i kanë bërë të masakrohen dhe të torturohen në një mënyrë të tillë”, thanë ata. Protesta është mbikëqyrur nga forcat e policisë, por ka kaluar pa incidente.

MD: Dënojmë çdo lloj dhune, besojmë te reagimi i menjëhershëm i drejtësisë greke

Ministria e Drejtësisë shqiptare shprehu dje keqardhjen për ngjarjen e rëndë të ndodhur në Burgun e Malandrinos në Greqi, me pasojë humbjen e jetës së gardianit Jorgos Cironis dhe në Burgun e Nigritas, me pasojë humbjen e jetës së Ilia Karelit, i cili vuante dënimin në këtë burg, duke kërkuar hetime të pavarura dhe të shpejta. “Ministria e Drejtësisë dënon çdo akt dhune ndaj shtetasve shqiptarë, të burgosur në burgjet greke. Duke besuar në marrëdhëniet e mira të fqinjësisë dhe bashkëpunimit ndërmjet autoriteteve të drejtësisë të dy vendeve, dhe në zbatimin reciprok te ligjit dhe marrëveshjeve e konventave ndërkombëtare, veçanërisht ato me fokus respektimin e të drejtave të njeriut, Ministria e Drejtësisë shpreh besimin se reagimi i drejtësisë greke do të jetë i menjëhershëm përsa i takon zbardhjes së çështjes pa vonesë”, thuhet në njoftim..