SHËNIM/ Basha: Konsensusi që (s’)dua!

Një ndër akuzat që Berisha e PD kur ishte në pushtet i bënte Ramës në opozitë ishte se kërkonte t`i imponohej si pakicë shumicës; pra, se kështu po prishte rregullat e demokracisë. E në role të kundërta, PD po tenton të bëjë të bëjë pikërisht  atë për të cilën deri dje akuzonte opozitën: t`i imponohet si pakicë shumicës, aq më tepër kur është më shumë se pakicë, e kur përballë ka një më shumë se shumicë, pas rezultatit plebishitar të 23 qershorit. Nuk është ndonjë gjë e re kjo. E gjithë politikëbërja e PD-së, pra e Berishës thënë më mirë, është e tillë që ka rënë bash në mu ato gropa që ka hapur vetë për kundarshtarin, duke përdorur dy a më shumë starndarte për të njëjtën çështje, gjë që ka sjellë një anormalitet ulëritës në kodet e mënyrës së të bërit politikë.

Mjafton rasti i freskët i zgjedhjeve të 2009, ku Berisha mbrojti proçedurën mbi parimin në aspektin juridik, përballë kërkesës së Ramës për hapje kutish; e dy vjet më vonë, ndërroi pllakë duke bërë të kundërtën, duke mbrojtur parimin mbi proçedurën (të numërohet çdo votë), e në fund e morri Bashkinë e Tirënës me proçedurë. Ose rasti i Bashës që akuzonte Ramën për nonses në mbajtjen  e dy posteve, atë të kreut të  Bashkisë dhe kreut të PS-së e e tani rri vetë në të njëjtat pozita.

Së fundi, edhe pse mazhoranca ka pranuar t`i ofrojë opozitës atë çfarë shprehu si kërkesë dy ditë më parë në kuadër të Komisionit mbi Reformën Territoriale, të drejtën e vetos, kreu i saj Basha, ose Berisha më saktë, prapë kanë refuzuar, duke e bërë më çorbë muhabetin, me Zanën e ILDKP-së dhe AMA-n, a thua se po diskutohet mbi parimet e konsensusit e jo për vetë konsensusin në një çështje të caktuar. Të martën tha: Nuk marrim pjesë në Komisionin Parlamentar për Reformën Territoriale, pa na u dhënë e drejta e vetos. 24 orë më vonë, mazhoranca u thotë: merreni të drejtën e vetos. Dhe reagimi i Bashës, është i llojit: Nuk jam zgjedhur për të pranuar konsensus, por për të kërkuar konsensus, me kushtin e vetëm që ai të mos më jepet (!)