SHËNIM: Ç’lajme do donim nga Presidenca?

Infot më të shpëlara të këtyre  dy ditëve, deri krejt të panevojshme në këtë klimë acari politik dhe një stresi social deri në makth, janë ato mbi vizitën që po bën Presidenti Nishani në SHBA. I ftuar për “Mëngjesin e Lutjeve”, një rit kortezial tradicional i organizuar nga Uashingtoni, që në vite ka pësuar një zhvlerësim të dukshëm si lajm (kryeminsitri Thaçi nuk preferoi të shkonte, paçka ftesës), siç kanë pësuar zhvlerësime ca takime krejt korteziale deri në rëndomsi që realizohen në të tilla raste me senatorë a kongresmenë, prej së cilave, dalin ca deklarata, aq zyrtare e të  thata, sa lajmi që i përmban të duket se vlen vetëm për të plotësuar një minutazh të caktuar të hapësirës informative. I vetmi lajm që ishte tentuar të prodhohej nga vizita e Nishanit në SHBA, ishte ai mbi alarmimin, medemek të Uashingtonit për qeverisjen e majtë, afërmendsh e një gazete të opozitës, i vlefshëm si lajm ndoshta për vitin 1994 , por jo për 2014. Nuk marr përsipër të them se atë që mendoj unë për Presidentin në zëra të përgjithshëm, e mendojnë të gjithë shqiptarët. Por në një zë, e kam një pretendim të tillë: në atë që Presidentin do donim të kishim pak më ndryshe, në kuptimin  që jo thjesht e kushtetueshmërisht të ishte përfaqësues i unitetit të popullit, por që të linte gjurmë në popull me rolin e tij, fjalën që thotë, iniciativat që merr, që mos ngjajë si i punësuar në Presidencë, por si një President, i cili, edhe në mos pastë shumë kompetenca kushtetuese, të ketë autoritetin e duhur për të përçuar unitet. Një President i duhur në këto kohë të trazuara politike dhe prej politikës, do ishte ai që do mund të pajtonte politikën, të ulte gjakrat e ndezur, e të bëhej garant i një kompromisi mes palëve, që edhe mes halleve të mëdha, të paktën njerëzit të mos torturoheshin dhe nga animalizimi i gjuhës politike, që u kumbon ndër veshë çdo çast. Ja ta tilla lajme do donim. Nëse Presidenti nuk na i mundëson dot, as ne e as vetes, të mos na trazojë stomakun me lajme të tipit “lëtyrë e pangrënshme” me vizita jashtë shtetit, Qoftë dhe në SHBA.  / E.H.