SHËNIM: Edhe seriozitet, edhe dërdëllitje… në emër të ligjit!

Reagimi që zëvëndësministri i Arsimit, Arbjan Mazniku, ka bërë ndaj ankesës së lëshuar prej ish-kreut të Arsimit në qeverinë Berisha, Genc Pollo, lidhur me mbylljen e dhjetra universiteteve private, mund të konsiderohet dhe si formula më e thjeshtë për të kuptuar se përse në Shqipëri, fakti që 2 + 2 = 4, ngjan aq e komplikuar dhe asnjëherë nuk ka rezultat racional. Sipas Maznikut, po të ishte zbatuar ligji, nuk do ndodhte kjo masë qeveritare që ka sjellë kaq tronditje. Dhe kjo vlen për të gjitha llojet e mbrapshtive në këtë vend. Çfarë ka ndodhur e po ndodh, ka ardhur vetëm se nga moszbatimi i ligjit. Furia e themelimit të universiteteve private, që më pas solli një piramidë të paparë diplomash, masterash e doktoraturash, i përket kohës së Pollos në krye të Arsimit. Dhe nëse vërtet nuk është zbatuar ligji, përgjegjës është dhe vetë Pollo; që do të thotë se për mosbatim ligji, edhe ai duhet të ndëshkohet. Kështu që, formula shpjeguese e Maznikut duhet të përfshijë dhe Pollon, si vullnet total për ta ballafaquar me ligjin, këdo që nuk e ka zbatuar atë. Një njeri që vret apo vjedh, sociologjikisht ka kryer një vepër të rëndë, ndërsa juridikisht ai ka shkelur ligjin. Dhe ndëshkimin vërtet e ka sociologjik, duke u privuar nga liria, por ky dënim jepet juridikisht, duke e gjykuar si shkelës ligji (neni kaq e neni aq, për vrasje e vjedhje). Ndaj, nëse ndërhyrja në “tregun” e Arsimit të Lartë me masa ndëshkuese bëhet në emër të ligjit, në këtë ndëshkim duhet të ketë një vend dhe për strumbullarin e kësaj pune: Pollon, dora vetë. Se e tha dhe në deklaratë për shtyp: Që është për zbatimin e ligjit! Deklaratë thashë?! Eshtë një dërdëllitje për qejf, në vapën e gushtit, që ngjan si politikëbërje, derisa (mos)zbatimi i ligjit – që Mazniku me të drejtë e shenjtëron – Pollos vetë, nuk i fut asnjë gjemb në këmbë! /E.H.