SHËNIM: Erdogan hajdut bagëtish?!

Skeptikët e teorive konspirative, janë tashmë përballë një prove jo të vogël, për t`i qëndruar  bindjes së tyre se dyshimi që pas çdo ngjarjeje ka një skenar prapaskenik, është thjesht një kompleks, që e bartin njerëz të dobët e të paaftë për t`i shpjeguar ngjarjet thjesht nga ajo që shohin e dëgjojnë: quhet Erdogan. Pas një odiseje shkaqesh për ta mbajtur të ndezur me doemos situatën në Turqi, ka dalë së fundi një fakt, që nuk ka të bëjë farë me atë se ç`lloj lideri e udhëheqësi është Erdogan, e se ç`lloj politikash e kanë çuar të bëjë atë që ka bërë në kaq vite pushtet, ku më së paku, e ka nxjerrë Turqinë nga borxhet; por ka të bëjë me mënyrën se në ç`pjacë të ulët, kundërshtarët e tij, e kanë ulur nivelin e inteligjencës së njerëzve për të ofruar një fakt si ky i fundit, ku Erdogan, në një komunikim me të birin i thotë atij që të fsheh milionat e eurove që kanë në shtëpi, e ku ky i fundit i përgjigjet: po baba!

Po dhe hajdutë të rëndomtë bagëtish po të ishin, prapseprap do kishin një komunikim më finok e më të kodifikuar se ky, nëse do ishte rast për të fshehur kecat, dhitë apo viçat e vjedhur nga frika e policisë. Është ndër ato dialogje që bën muuu si një stisje që ka për qëllim provokimin e një lumpenproletariati si ai që, kush e njeh skutë më skutë lagjen “Taksim”, e njeh mirë se ç`përfaqson, ku edhe sikur t`u thuash se Erdogan ka bërë gomarin të fluturojë, nuk e vënë aspak në dyshim, për shkak se e kanë trurin në “off” për ca rrethana sociale të marra me mend. Argumenti që ofrohet nga shqipo të rrjeteve sociale se, kinse kështu reagoi dhe Meta kur tha se videoja ndaj tij ishte montim, nuk qëndron.

Erdogan është kontestuar për shumë gjëra gjatë qeverisjes së tij, por kurrë nuk është përfolur se është i korruptuar, se nxit korrupsionin, apo se bën një jetë në stil hedonist që bie era korrupsion. Madje, është e njohur thënia e tij kur u pyet nga një gazetar sapo erdhi në pushtet, se si do i realizonte gjithë ato premtime të bujshme që kishte bërë, sidomos në fushën e zhvillimit ekonomik, dukë thënë: “Thjesht duke mos vjedhur!” . Është pak paranojak? Po! Është e pamundur të mos jesh paranojak në një vend si Turqia ku ushtria ka bërë kërdinë me komplote duke çuar dhe kryeministra në litar, siç Menderez. Të shohim se ç`do të ndodhë më tej, tanimë që arritën ta bëjnë dhe “hajdut bagëtish”! /  E.H.