SHËNIM: Fati ynë mes nëntokës dhe mbitokës

Të mësuar më faktin se jemi tokë e bekuar me pasuri të shumta, një lajm sipas së cilit Shqipëria renditet tek vendet  që nuk  tregojnë për rezerva ari, mund t`u ketë ardhur hidhur shumë shqiptarëve. Aq më shumë nga fakti se mendësia jonë mbi sigurimin e jetës dhe së ardhmes, dominohet jo nga puna por nga dhuratat prej qiellit e tokës, që na mbijnë tek dera një mëngjes. Nëse ka një produkt artistik nga koha e komunizmit që duhej promovuar akoma më shumë në kohën e demokracisë, ky duhej të ishte ai filmi vizatimor me atë plakun që para se të jepte shpirt, u thotë të bijve që diku ka fshehur një thesar të cilin duhet ta gjejnë duke gërmuar. “Kërkojeni bijtë e mijë se do ta gjeni!” – ishte këshilla e fundit e plakut me zë të zvargur, para se të mbyllte sytë përgjithnjë. Bijtë dembela nisin të gërmojnë tokën me një vrull të paparë, pa e kuptuar se njëherësh po e punonin atë, prej së cilës po merrnin fryte të mbjellash e prej tyre të ardhura. Më në fund, pak përbërje “floriri” e mbetur në mendjen e tyre, bëri që të kuptojnë se thesari i vërtetë ishte puna. Ne nuk duhet të trishtohemi nëse lajmet thonë se nëntoka jonë nuk ka ar, por nëse thonë se mbitoka është përplot dembelë dhe të paaftë!      / E.H.