SHËNIM: Gëzimi dhe trishtimi që vjen nga opozita

Pas rënies së Lazaratit, opozita ia atribuoi vetes suksesin e ndërhyrjes policore në fshatin legjendar, duke luajtur kartën e ndërgjegjësimit qeveritar pikërisht prej saj, për ta luftuar drogën.  Dhe, sikur ndodhi vërtet që aksioni i saj opozitar antidrogë, ashtu me pacipësi e hipokrizi, me shfaqje gjithë paradoks siç qe prania e kryekomunarit Aliko në një prej protestave, në fund u duk se vërtet ashtu ishte, se vërtet opozitës i takonte ndezja e fitilit të “zjarrit” mbi Lazarat. Dhe për hir të së mirës së përgjithshme, le t`ia njohim meritën. Por a vlen kjo dhe për aksionin e ri, atë të denoncimit të elementëve me dosje penale në parlament në pozita deputetësh?! Edhe në këtë rast, pacipësia është ulëritëse. Opozita, jo thjesht një a dy deputetë, por vetë dy kokat e saj, Bashën e Berishën e ka me plot bëma me përmbajtje penale, ku në krye qëndron vrasja e katër njerëzve më 21 janar të 2010. Por ja që, ndryshimi i pozitave politike, ka bërë që mos shihet trau në syrin e saj, por qimja në syrin e mazhorancës. Dhe siç në rastin e Lazaratit, ka ndopak hapësirë për të menduar se çoç një e mirë mund të përftohet në këtë rast, e që është ndjeshmëria e ndërgjegjësimi në rritje e partive kryesore politike, për cilësinë njerëzore që mbajnë apo fusin në gji. Por vetëm kaq. Pas kësaj, të zë një trishtim i madh ku mendon se PD është themeluesja e një standartit të ndyrë të dy a më shumë standarteve në politikë, ku për atë që e bën vetë ashiqare, klith si e çmendur dhe paturp se po e bën ose të mos e bëj tjetri. Shembujt për këtë, janë bërë kapicë në 20 e kusur vite. Por mjafton dhe më i freskëti, ky i Ndokës. Ai militoi për vite me rradhët e PD-së dhe fare mirë mund të ishte dhe deputet i kësaj partie dhe askush aty të mos e rruante (siç nuk u rruhet dhe tani për të kaluarën e tij në gjirin e tyre), se çfarë ka bërë ai në të ritë e tij. Dhe kjo është ajo që të trishton në këtë opozitë, tipike prej hajduti që thërret për t`u kapur hajduti!     / E.H.